500 000 ruvnno doarjjan GSG AS:i Gussanjárggas mii fállá bálvalusaid plastihkkabarggus

500 000 ruvnno doarjjan GSG AS:i Gussanjárggas mii fállá bálvalusaid plastihkkabarggus

Sámediggi lea addán 500 000 ruvnno doarjjan GSG AS:i cegget viesu dan oktavuođas go ođđasit atnet ja resirkulerejit PE-plastihka. Fitnodat lea Gussanjárggas Davvesiidda gielddas.

Viesu sajádat lea guovllus mii lea meara ja mearradoalu lahka.

Fitnodat áigu ođđasit atnit ja ávkkástallat guollebiebmanmerddiid ja eará plastihka ceavzilis vugiin. Fitnodat bargá ovddidit vuogi mas stuorát oassi adnon plastihkas sáhttá ođđasit adnot ja ávkkástallojuvvot.  

– Lea dehálaš ahte Sámediggi doarju mearrasámi guovlluid fitnodagaid ásaheami ja ovddideami, ja mii oaidnit ahte dát báikkálaš fitnodat lea huksen gelbbolašvuođa mii lea dehálaš guollebiebmanealáhussii guovllus, dadjá sámediggepresideanta Silje Karine Muotka (NSR).

Sámediggepresideanta dadjá ahte lea dehálaš sihke oažžut ja bisuhit hui dárbbašlaš bargosajiid giliin nu go Gussanjárggas, ja presideanta lea duhtavaš fitnodagaiguin mat barget ceavzilis čovdosiiguin. GSG AS Gussanjárggas fállá maid gelbbolašvuođa printemis ja CNC čuohppamis šilttaid, logoid ja 3D buktagiid buvttadeami oktavuođas.

Doarjja addojuvvo doarjjaortnegis máŋggabealálaš ealáhusat, vuoruheamis doaibmabijut mat mealgadit addet ođđa háhkama ja fitnodatovddideami. Investeren nanne fitnodaga ovcci bargi bargosajiid, ja lea dehálaš birasdoaibma go investeren mielddisbuktá ođđasit geavaheami ja ávkkástallama guollebiebmanmerddiin ja eará plastihkas