Ruđat leat dál juogaduvvon golmma prošektii sierra ohcanvuoru maŋŋá. Guokte prošeavtta gullet Nordvika dállui Bådåddjo suohkanis. Dát lea bihtánsámi dállu mas leat automáhtalaččat ráfáidahttojuvvon visttit Valnesvatnet nammasaš jávri lahka. 

Ovdal lea Sámediggi veahkehan divvut ássanviesu. Dál lea láđu ja eanageallára vuorru, ja oktiibuot juolluduvvo 340 000 kruvnnu dán guovtti prošektii. Dálus eai ása olbmot, muhto doppe lea ustitvuođasearvi. Dat lea čáppa guovllus Valnesvatnet jávregáttis, ja lea álki beassat dohko olbmuide. 

– Lea hui buorre go ustitvuođasearvi dahká dán dehálaš barggu. Sii áimmahuššet visttiid mat gullet hárvenaš kulturbirrasii, ja mun lean ilus go mii sáhttit doarjut dán, dadjá sámediggeráđđi Runar Myrnes Balto (NSR).

Goalmmát juolludeapmi manná Bihtánsámi museai ja prošektii Bihtánsámi jienat - bihtánsámi huksenárbi, mii oažžu 160 000 ruvdno. Árbedieđu seailluheapmi, čohkken ja gaskkusteapmi leat prošeavtta váldocakkit.

– Árbediehtu ja duodjegelbbolašvuohta lea dárbbašlaš jus galgá sáhttit bisuhit bihtánsámi huksenárbbi. Danne lea hui deaŧalaš ahte ráhkaduvvojit arenat dán gelbbolašvuođa gaskkusteapmái ja viidáseappot fievrrideapmái, dadjá sámediggeráđđi Myrnes Balto.