«Oadjebas Guovdageainnus» lea bargu kvalitehta buorideami ovdii servodatdásis, man ulbmil lea sihkkarastit ahte buot oasit servodagas barget veahkaválddálašvuođa, illastemiid, gárrenmirkkuid eastadeami ja iešsorbmemiid vuostá. Guovdageainnu suohkandoavttir lea čujuhan veahkaválddálašvuođa, seksuálalaš illastemiid ja iešsorbmemiid lassáneapmái. Suohkan lea ásahan bargojoavkku mii servodatdásis bargá veahkaválddálašvuođa, illastemiid, gárrenmirkkuid geavaheami ja iešsorbmemiid eastademiin.
Prošeavtta ulbmiljoavku leat mánát ja nuorat. Áigot ásahit stivrenjoavkku, mas maiddái nuoraidráđđi ja ohppiidráđđi leat mielde, fágaidrasttideaddji bargojoavkku, referánsajoavkku ja geavaheddjiidjoavkku. Dasa lassin hábmejuvvo prográmma mas leat eastadandoaimmat maid áigot sajustit váldoarenaide: ruovttuide, mánáidgárddiide, skuvllaide, astoáigebáikkiide ja dearvvašvuođabálvalusaide.
Dasa lassin prošeavttas leat čuovvovaš oasseulbmilat:
- Ii oktage mánná iige nuorra galgga vásihit veahkaválddálašvuođa dahje illasteami
- Mánáide ja nuoraide galgá sihkkarastojuvvot buorre psyhkalaš dearvvašvuohta dorvvolaš servodaga bokte
- Galgá leat nullavišuvdna iešsorbmemiid hárrái
- Vuollel 18-jahkásaš mánát ja nuorat eai galgga atnit gárrenmirkkuid
– Min mielas dán prošeavtta lea deaŧalaš doarjut, ja dat heive oktii Sámedikki doaibmaplánain veahkaválddi vuostá. Eastadanbargu sáhttá mielddisbuktit dorvvoleabbo boahtteáiggi buohkaide, dadjá sámediggeráđđi Elisabeth Erke (Gb).
Guovdageainnu suohkan dat jođiha barggu ja olles servodat searvvahuvvo dasa. Prošeavttas áigot ráhkadit prográmma mas leat eastadandoaimmat, lágidit systemáhtalaš gelbbolašvuođaloktema ja bagadallamiid, nannet arenaid mat juo gávdnojit ja guorahallat makkár arenaid mánáid ja nuorat dárbbašit.
– Eastadanbargguiguin mii hábmet vuođu boahtteáigái mas ii leat veahkaválddálašvuohta iige illasteapmi. Áŋgiruššan mánáid ja nuoraid ovddas lea investeren min servodahkii. Mis ii leat oktage massit, dadjá sámediggeráđđi Maren Benedicte Nystad Storslett (NSR).