-Tråante lea Åarjel-Saepmie guovddážis. Dákkár áŋgiruššan meašttirgilvvuid botta boahtá veahkehit čielgasit čalmmustahttit sámi kultuvrra. Lea hui positiiva ja lean ilus go mii sáhttit veahkehit, dadjá sámediggeráđđi Maja Kristine Jåma (NSR).

Maja Kristine Jåma Ørjan Marakatt Bertelsen

Guokte, goabbatlágan ohccámuša leaba ožžon doarjaga goabbatlágan doarjjaortnega bokte:

• Tråanten Saemien Dåehkie searvi lea ožžon 300.000 ruvnno “Doarjja Regionálaovdánahttinprošeavttaide” doarjjaortnegis bálkáhit prošeaktakoordináhtora vai sámi kultuvra čalmmustahttojuvvo čuoigamiid máilmmimeašttirgilvvuiguin. Koordináhtor galgá plánet ja ovddidit sámi kultuvra- ja ealáhusdoaimmaid SKI-VM botta. Prošeavtta bargovásáhusaiguin galgá kártet doaibmanvejolašvuođaid doaimmahišgoahtit sámi servvodatovdáneami Tråantes Nasjonaljubileet 2030 rádjai. Searveruhtadeapmi prošeavtta dáfus lea dahkkon Trööndelagen fylkkasuohkaniin, mas lea ovttasbargošiehtadus Sámedikkiin. 
• Ski-VM 2025 searvi oažžu 200.000 ruvnno “Kulturdoaibmabidju” doarjjaortnega bokte sámi kulturáŋgiruššamii, mii lea oassin meašttirgilvvuid kulturprográmmas. Ruhta galgá geavahuvvot fátmmastit sámi artisttaid ja kulturdoaimmaheddjiid. Sámediggi ja SKI-VM 2025 guorahallába vejolašvuođaid searvevuođašiehtadusa dahkat.

-Ii leat Tråante 2017:i rájes ná stuora áŋgiruššan leamaš sámi kultuvrii dán gávpogis. MM bistet measta guokte vahkku ja šaddá álbmotfeastan. Šaddá vuogas ja dehálaš čalmmustahttin ja velá čielga dohkkehus min kultuvrras ovtta dain stuorámus valáštallandoaluiguin riikkas, dadjá Jåma.

SKI-VM álgá guovvamánu 26.beaivvi ja loahpahuvvo njukčamánu 9.beaivvi ja fátmmasta 33 gilvvu. Kulturprográmma váldoarenat leat Granåsen, Medaljetorget ja Tråante guovddáš.