Luohtevuorkkás lea skearročoakkáldat mas leat boares luođit maid Romssa musea lea čohkken áigodagas 1952-1972. Almmolaš arkiivvain leat birrasii 15 000 luođi oktiibuot ja Romssa museas lea stuorámus čoakkáldat. Dáid áigu dál sámi girjelágádus ja skearrobuvttadeaddji DAT AS almmuhit digitálalaččat

Prošeavttas Luohtevuorkkás leat válljejuvvon luođit máŋgga guovllus Sámis vai lea eanemus lági mielde eatnatgeardáivuohta almmuhemiin. Dasa lassin galgá digitála almmuheamis leat vejolaš ohcat ja galgá leat eanet olámuttos almmolašvuhtii.

Johan Sara jr. oažžu ges 199 000 ruvnno doarjjan báddenprošektii Sámi jahkodat, mas mihttun lea almmuhit sámi musihka mas lea stuorát máŋggadáfotvuohta. Dat lea ođasmahtti dálááiggebuvttus mas juoigan ja luondu lea vuolggasadjin ja lea čállojuvvon dávgečuojanasjovkui mas leat njeallje čuojaheaddji ja pianoi, ovttasbarggus Ensemble Noorain ja Scene Nordain.

DJ iDJa, Markus Johnsen Thonhaugen, lea sámi artista ja elektrovnnalaš musihkkabuvttadeaddji gii lea olahan dobbelii riikkarájiid. DJ iDJa lea doaba sámi musihkas, ja su dáidagis leat nanu ruohttasat sámi kultuvrras. DJ iDJa galgá ovdánahttit ollislaš márkanfievrredanstrategiija mainna galgá olahit sihke sámi publikumii ja guldaleddjiide riikkaidgaskasaččat. Son áigu ovttasbargat duiska PR-ageanttain vai sáhttá olahit riikkaidgaskasaččat iežas musihkain ja son áigu ráhkadahttit ođđa visuála profiilla DJ iDJai artistan.

– Buvttadeapmi sámi musihkkabirrasis lea girjái, digitála almmuhemiid rájes badjel čuođi jagi boares luđiin gitta ođđaáigásaš artisttaide ja jietnadáidagii. Seammás go beassat oahpásnuvvat dološ luohteárbevieruiguin digitála luođi bokte, de beassat maid vásihit boahtteáigásaš jietnadáidaga. Mis lea gelddolaš musihkkačakča vuordimis, dadjá sámediggeráđđi Maja Kristine Jåma (NSR).

Doarjagat addojit doarjjaortnegis Luohti ja sámi musihkka.