Vásit Sápmi AS Sievjjus lea ožžon 100 000 ruvnno doarjjan ráhkadit video- ja jietnagirjji girjjis Julláža moddjenlávka, maid Åsá Márgget Anti lea čállán. Girji heive sihke boarráset mánáide ja nuoraide.
– Gávdnojit unnán jietna- ja videogirjjit davvisámegillii mánáide ja nuoraide, ja lea buorre go sáhttit dahkat girjjálašvuođa eambbo olámuddui, dadjá sámediggeráđđi Maja Kristine Jåma (NSR).
Dasa lassin lea sámediggeráđđi addán doarjaga njealji sierra prošektii filbma- ja dokumentárašáŋŋera siskkobealde.
Stær AS Romssas lea ožžon 100 000 ruvnnu ráhkadit filbmejuvvon juoiganmusikála ovttas Elle Sofe Sarain, prošeavtta namma lea ÁRRU. Luohtemusikálas galgá leat máilmmivuosttaščájálmas 2025:s ja lea vuosttaš luohtemusikála mii buvttaduvvo. Sara lea maiddái vuosttaš sámi nisson rešissevra gii lea ožžon buvttadandoarjaga Norgga filbmainstituhtas.
– Elle Sofe Sara lea earenoamáš čeahpes dáiddár ja go son lea mielde bargame dakkár stuora prošeavttain, mii lea vuosttaš dán lágan prošeakta, de lean oadjebas das ahte boađus šaddá musikála mii sáhttá ollet guhkás olggobeallái Sámi rájiid, dadjá Jåma.
7ish film AS Ivgobađas lea ožžon 100 000 ruvnnu buvttadit oanehisfilmma mas lea namma Romssa Táksi. Muitalus lea biddjon Romssa gávpogii, gos guokte nuorra sámi nieidda ferteba gieđahallat rasismma dan botta go vuordiba drošše.
Dasa lassin lea Paranord Film AS Álttás ožžon 100 000 ruvnnu fikšuvdnafilbmii, Niillas Somby muitalusa vuođul, ja man namma galgá leat In my hand. Filbma galgá čájehuvvot Bådåddjo 2024 oktavuođas, ja galgá guorahallat gažaldagaid mat leat hui áigeguovdilat dán máilmmis; earret eará ahte makkár oaffariid olbmot leat mielas dahkat iežaset álbmoga ovddas.
Alfred film og TV AS Romssas lea ožžon 100 000 ruvnnu prošektii Oro Jaska, mii lea sámegielat nuoraidráidu mii galgá oidnot NRK:s. Historjá čuovvu olbmážagaid Kárášjogas geaidda buohkaide váikkuha dramáhtalaš dáhpáhus, veagalváldin feasttas. Ráiddu fáddá lea movt lea bajásšaddat smávva servodagas, gos leat lagas čanastagat ja gos lea váttis leat rabas ja beassat leat ieš.
– Lea hui somá go mii leat nagodan doarjut nu ollu buriid prošeavttaid filbmasuorggis dán háve. Buot dáin prošeavttain lea stuorra historjjálaš árvu ja dat leat mielde čalmmustahttime muhtun servodatváttisvuođaid maid dál lea áigi eambbo čuvget, dadjá Jåma.
Dasa lassin lea Nordfar AS Miedasvärrdas (Misvær) ožžon 100 000 ruvnno duođaštit ja loktet ovdan bihtánsámi guovllu sámi historjjá prošeavttain Mujto – den pitesamiske fortellingen. Prošeakta galgá leat oassi Bådåddjo 2024:s ja dat lea huksejuvvon Duohtavuođa- ja seanadankommišuvnna raportta ala, mas áigumuš lea deavdit bihtánsámi historjjá ráiggiid.
– Bihtánsámi historjá lea uhccán duođaštuvvon, ja lea stuorra mearkkašupmi duođaštit máhtu bihtánsámi kultuvrra ja historjjá birra, ja mun lean ilus go dat dál sáhttá čuvgejuvvot, ovdanbuktojuvvot ja gaskkustuvvot Bådåddjo 2024 oktavuođas, dadjá Jåma.