Álttá Siida lea okta njealji ovddasmanni mánáidgárddiin SáMOS prošeavttas, ja guovttis mánáidgárddi bargiin leamaš mielde prošeavttas. Dál galget muđui mánáidgárddi bargit oažžut gelbbolašvuođaloktema sámi filosofiija, pedagogihka ja bajásgeassima ektui. Bargit galget oažžut logaldallamiid ja bargat iešguđetlágan bargobihtáiguin, ja galget maid plánet ja čađahit iešguđetlágan doaimmaid mánnájovkui. Váhnemat geain leat mánát geat ohcet mánáidgárdái galget maid oažžut ipmárdusa das mii sámi pedagogihkka ja filosofiija lea.

Prošeavtta ulbmilin lea ovddidit pedagogalaš vuođu, nu ahte mánáidgárdi bargá sámi metodaid mielde mat vuođđuduvvet sámi gillii, kultuvrii ja árbevirolaš máhttui heivehuvvon ođđaáigásaš sámi servodahkii. Prošeavtta guovddáš oasit leat Iešbirgejupmi/iešbirgejeaddji ja Searvelatnja.

- Mánáidgárdi lea bures boahtán johtui bargguin implementeret sámi pedagogalaš prinsihpaid mánáidgárdái ja bargat nanu giellaoahpahusmodeallaid vuođul buohkaid várás, dadjá sámediggeráđđi Mikkel Eskil Mikkelsen (NSR). Mikkelsen sávvá Álttá Siidii lihku prošeavttain.

Jentoftsletta mánáidgárdi Bådådjos lea ožžon 300 000 ruvnno prošektii Sámi resursaolmmoš. Prošeavtta ulbmil lea ahte mánáidgárddis galget leat liige bargit ossodagas geain lea julevsámegiel gelbbolašvuohta ja julevsámi kulturgelbbolašvuohta. Dát danne vai mánáidgárdi galgá sáhttit addit sámegieloahpahusa nanu giellaoahpahusmálliid mielde. Liige julevsámi resursa galgá doarjut sihke julevsámi mánáid ja julevsámi bargiid geat leat ossodagas. Dát mielddisbuktá maid ahte mánát besset gullat eanet rávisolbmuid gulahallame julevsámegillii. Resursaolmmoš galgá maid leat mielde váhneneahkediin. Váhneneahkeda ulbmil lea nannet váhnemiid julevsámegiela geavaheami.

- Lea buorre oaidnit ahte julevsámegielat mánáidgárdefálaldat Bådåddjo suohkanis nannejuvvo. Dan mii deattuhit ovttasbargošiehtadusas mii mis lea Bådåddjo suohkaniin, dadjá sámediggeráđđi Mikkelsen. Son loahpaha sávvámiin lihkku prošeavttain Jentoftsletta mánáidgárdái.


Doarjja lea juolluduvvon mánáidgárddiid prošeavttaid ja ovddidanbarggu doarjjaortnega bokte, man ulbmil lea ahte mánáidgárddit galget oažžut alit dási sámi gielas ja kulturbarggus.

Dán ortnega ohcanáigemearri lea 02.10.2023 dii.15.00.