Sámediggi lea juolludan 120 000 ruvnno fitnodahkii Audioland AS luohteálbuma almmustahttimii trioin 3xNiillas, mii plánejuvvo almmustahttojuvvot 2024 loahpas. Trio joavkkus leat juoigit Anders Nils J. Eira/Mihkkala Joavnna Ánte Niillas Mázes, Nils Lars N. Eira/Sire Máhte Áslat Niillasa Niillas Ándde Niillas Kárášjogas ja Nils Johan A. Gaup/Egan Ántte Nils Juhán Guovdageainnus.
Prošeavtta vuođđun leat luođit maid trio lea ráhkadan maŋemus jagiid. Trios leat nana ruohttasat sámi juoiganárbevirrui, ja sin musihkka speadjalastá sámi árbevieruid Sis-Finnmárkkus. Juolludus addojuvvo doarjjaortnega Juoigan ja sámi musihkka bokte.
– Árbevirolaš sámi luođi almmustahttin lea dehálaš sámi musihkkasuorgái, dadjá sámediggeráđđi Maja Kristine Jåma (NSR).
Dasa lassin leat máŋga musihkkii guoskevaš prošeavtta ožžon juolluduvvot doarjaga 2023 loahpas Kulturdoaibmabijut doarjjaortnega bokte, oktiibuot 490 000 ruvnno ovddas.
Earret eará lea Ramona Linnea Sørfjell ožžon 100 000 ruvnno lágidit ovdanbuktima álbumas Stories of Sápmi lávddis Bådåddjo 2024 rahpanvahkus.
Dasa lassin lea Davvi-Norgga Jazzguovddáža vuođđudus Stiftelsen Nordnorsk Jazzsenter ožžon 100 000 ruvnno ovdanbuktit eanet sámi artisttaid Northern Expo nammasaš suorgedeaivvadeamis Bådåddjo 2024 oktavuođas. Northern Expo galgá ovddidit gánnáhahtti musihkkasuorggi mii galgá addit artisttaide vejolašvuođa ovdánit nationálalaččat ja riikkaidgaskasaččat.
– Bådåddjo 2024 lahkona eanet ja eanet ja lea illudahtti go beassat addit doarjaga prošeavttaide main sámi artisttat leat mielde Bådåddjo 2024 prográmma čađaheamis, dadjá Jåma.
Sámi jienat koarra lea ožžon 70 000 ruvdnosaš doarjaga prošektii ČSV Sámis, mas galget dokumenteret ja ovddidit konseartaprográmma mas leat sámi proteastalávlagat ráhkaduvvon koaraid váras. Prošeavttas lea kultuvrralaš mearkkašupmi maiddái sámi servodahkii oppalaččat go dákkár lávlagat čuojahuvvojit.
Viidáseappot lea dát ohccit ožžon doarjaga festiválaid dahje konsearttaid oktavuođas:
- Meronat AS oažžu 100 000 ruvnno Eddemannak musihkkafestiválii
- Røverstaden AS oažžu 80 000 ruvnno Nordaførr 2024 prošektii
- Elverhøy sokn oažžu 40 000 ruvnno musihkkahonoráraide girkokonsearttaid oktavuođas