Dán doarjjaortnega mihttomearri ahte mánáidgárddit oahpahit sámi mánáide sámegiela. Ortnega bokte doarju Sámediggi ulbmillaš doaibmabijuid mat veahkehit ovddidit sámegiela ja sámi kultuvrra sámi mánáide mánáidgárddiin.   

​– Árra giellaoahpaheapmi lea mearrideaddji dasa ahte sámegielat seilot ja viidásetfievrreduvvojit. Go mánát besset geavahit sámegiela lunddolaččat mánáidgárddis, de dat bidjá nanu vuođu viidáset giellaovdáneapmái, dadjá sámediggeráđđi Ann-Elise Finbog (SáB). 

​Doarjjaortnet vuoruha mánáidgárddiid mat láhčet sámegieloahpahusa sámegielat mánáide. Dan čieža mánáidgárddis mat dássážii leat ožžon doarjaga leat 34 davvisámegielat máná geat ožžot sámegieloahpahusa iežaset mánáidgárddis. 

​– Ahte mánáidgárddit aktiivvalaččat láhčet dili sámegieloahpahussii lea mielde nannemin mánáid gielalaš oadjebasvuođa, ja lea áibbas mearrideaddjin sámegielaid viidáset ovddideapmái, dadjá Finbog. 

​Mánáidgárddit mat fállet, dahje háliidit fállat, sámegieloahpahusa sámi mánáide sáhttet ohcat doarjaga Sámegieloahpahus mánáidgárddiin doarjjaortnegis. Maiddái sámi mánáidgárddit ja sámi ossodagat dárogielat mánáidgárddiin sáhttet ohcat, jus mánáin lea sámegieloahpahus eará sámegillii go mánáidgárddi dahje ossodaga váldogielas.  

​Ohcanáigemearri lea čakčamánu 1. beaivvi 2026 dii.15.30.

Dát ožžot doarjaga: