Prošeavtta mihttu lea almmuhit guoktenuppelohkái girjji lullisámegillii ovdal jagi 2025 loahpa. Váldoulbmiljoavku leat stuorebuš mánát ja nuorat – sin váste lea dál unnán lullisámegiel girjjálašvuohta gávdnamis. Prošeavttas erenoamážit deattuhit girjjiid mat heivejit dan ahkejovkui, ja girjjiid maid vuođul sáhttá ráhkadit videogirjjiid.
– Mii dárbbašit eambbo miellagiddevaš ja iešguđetlágan girjjiid lullisámegillii – erenoamážit stuorebuš mánáide ja nuoraide. Go lea viidát girjjálašvuođafálaldat, de nuorat besset eambbo iešguđetlágan girjjiid lohkat ja ožžot ođđa lohkanvásáhusaid iežaset gillii. Dat buorida lohkanmovtta, gielladovddu ja kultuvrralaš gullevašvuođa. Go girjjálašvuohta lea olámuttos, de lea álkit hupmat ja oahppat lullisámegiela, dadjá sámediggeráđđi Ole-Hnerik Bjørkmo Lifjell.
Fylkkagirjerájus, Trööndelagen fylhkengøragåetie, lea máŋggaid jagiid leamaš dehálaš doaibma sámi girjjálašvuođa almmuheamis. Dat lea jorgalan girjjiid lullisámegillii, muhto maiddái veahkehan bihtán-, julev-, davvi-, nuortalaš- ja ubmisámegiela girjjiid oktavuođas. Dasa lassin dat lea eanebuidda dahkan vejolažžan bargat jorgaleaddjin, go lea bálkáhan sihke ođđa ja hárjánan jorgaleddjiid, ja dat maiddái lea veahkehan nannet gelbbolašvuođa go lea jorgaleddjiide fállan rávvema ja bagadallama dađistaga.
Mávssolaš giela ovdáneapmái ja oahppamii
Maiddái sámediggeráđđi Maren Benedicte Nystad Storslett, geas lea ovddasvástádus earret eará gillii ja oahpahussii, deattuha man mávssolaš prošeakta lea giela nannemii ja oahppamii.
– Vai giela sáhttá oahppat ja hupmat, ja vai dat lea lunddolaš oassi eallimis, de fertejit gávdnot girjjit ja sisdoallu mat heivejit mánáid ja nuoraid beroštumiide. Trööndelagen fylhkengøragåetie bargu lea mearrideaddji dehálaš vai lullisámegiel girjjálašvuohta lea olámuttos olbmuide. Dat mielddisbuktá ahte giella ovdána, dat nanne mánáid ja nuoraid beaivválaš oktavuođa gillii. Videogirjjiid atnet hui oallugat, ja dat bures doibmet doarjjan giellaoahpahusas, dadjá Storslett.
Doarjja juolluduvvo doarjjaortnegis Prošeaktadoarjja sámi girjjálašvuhtii.
Prošeavtta birra sáhttá eambbo lohkat fylkka girjeráju, Trööndelagen fylhkengøragåetie, neahttasiiddus