Rådgiving om spiseforstyrrelser (ROS) oažžu 265 000 ruvnnu doarjjan prošektii “Eastadit borranváttuid sámi mánáid ja nuoraid gaskkas”.

ROS háliida galledit Kárášjoga ja Guovdageainnu joatkkaskuvllaid vai ožžot máhtu ja doarjaga. Skuvllaid galledemiid bokte áigu ROS leat oidnosis skuvlabirrasis, doallat logaldallamiid borranváttuid birra, ja deaivvadit skuvllaid dearvvašvuođabuohccedivššáriiguin fágalaš gulahallama ja gelbbolašvuođasirdima dihtii.

LINK Tromsø og omegn oažžu 448 000 ruvnno doarjjan prošektii “Iešstivren ságastallanjoavkkut rávesolbmuide geain leat sámi gullevašvuohta”.

Prošeavtta ulbmil lea eastadit ja geahpedit psyhkalaš dearvvašvuođaváttuid dainna lágiin ahte fállat iešstivren ságastallanjoavkkuid. Dáid joavkkuid bokte galget oassálastit oahppat fuolahit iežaset dárbbuid, ja eastadit olggušteami ja oktonasvuođa.

– Lea deaŧalaš ahte sámi mánát, nuorat ja rávisolbmot ožžot fálaldagaid mat leat heivehuvvon sin gillii ja kultuvrii. Danne lea hui buorre go ROS ja LINK háliideba čađahit prošeavttaid mat nannejit psyhkalaš dearvvašvuođa sámi servodagain. Dat ahte olmmoš oidnojuvvo, guldaluvvo ja dohkkehuvvo – almmá dubmehallamis, suddje sihke iešsorbmema ja iežas skáidnema vuostá, lohká sámediggeráđđi Runar Myrnes Balto (NSR).