Sámediggepresideanta Silje Karine Muotka (NSR) oaivvilda ahte lea riekta ja deaŧalaš ahte Sámediggi doarju dakkár prošeavtta mii sáhttá buktit eallinnávccalaš vuonaid ja boađuid Porsáŋggu álbmogii.

– Mii diehtit ahte vuonain sámi guovlluin lea dorskenálli njiedjan - ja dákkár máhttovuđot prošeavttat sáhttet addit mávssolaš vásihusaid maid maiddái eará vuotnaguovllut davvin sáhttet geavahišgoahtit, dadjá Muotka.

Prošeakta čađahuvvo ovttas Mearradutkaninstituhtain, ja višuvdnan lea addit Porsáŋggu álbmogii fas vejolašvuođa ávkkástallat báikkálaš dorskeresurssaiguin 8-10 jagi sisa. Ovttasbarggus dutkanásahusaiguin ja báikkálaš ealáhusaiguin, de galgá 2023 čavčča rájes buvttaduvvot ja biddjojuvvot stárravuovdi Leaibevutnii, mii lea ovddeš gođđosadji vuotnadorski ektui.

Doarjja ovdaprošektii - duođaštanguovddáš Mázii

Sámediggeráđđi lea maid juolludan 181 500 ruvnno ovdaprošektii Álttá-/Guovdageaineanu duođaštanguovddáža ásaheami oktavuođas Mázii. Duođaštanguovddáš galgá leat sámi historjjá nationála seailluhanásahus, seammás go dat galgá duođaštit ja gaskkustit.

– Sámi álbmogii lea deaŧalaš ahte dát duođaštanguovddáš ásahuvvo. Eiseválddit dáhtto dulvadit olles sámi gili, Máze, Álttá-/Guovdageaineanu dulvadeami oktavuođas. Juste dán ášši galggalii ipmirdit sápmelaččaid oktasaš nationála trauman. Ahte dát guovddáš ásahuvvo, lea maiddái deaŧalaš dan seanadanbargui mii berrešii šaddat Duohtavuođa- ja soabahankommišuvnna barggu ja evttohusa boađusin, dadjá sámediggepresideanta.

Doarjja Offroad Finnmárkui

Dasa lassin lea sámediggeráđđi borgemánus juolludan 150 000 ruvnno doarjjan Finnmarksrittene AS:ii báikkálaš biepmu, kultuvrra ja ealáhusaid promoteremii Offroad Finnmárkku meahccesihkkelfestivála lágideami oktavuođas.

Gilvvut lágiduvvojit jahkásaččat suoidnemánus/borgemánus ja čađahuvvojit guovddáš sámi guovllus Sis-Finnmárkkus. Finnmarksrittene háliida leat deaŧalaš veahkkin dasa ahte oainnusmahttit sámevuođa, lasihit máhtolašvuođa sápmelašvuođa birra ja fuolahit rivttes geavaheami sihke sámi kultuvrras ja identitehtas, ja dasto ovttasbargat lávga sámi aktevrraiguin.

Buot doarjagat juolluduvvojit regionálaovddidanprošeavttaid doarjjaortnegis, mas lea rabas ohcanáigi gitta skábmamánu 1. beaivvi 2023 rádjai. Doarjjaortnega ulbmilin lea árjjalaš ja ulbmildiđolaš ovttasbargu regionála ja báikkálaš eiseválddiiguin nannen ja ovddidan dihtii sámi kultuvrra, giela ja servodateallima.