Davvi Siida lea sámi turistadoaimmahat mii lágida luonddu- ja kulturvásáhusaid mat leat vuođđuduvvon sámi kultuvrii. Mearkagálvovuoruheami mihttu lea nannet gánnáhahttivuođa ja dahkat duoji oassin Davvi Siidda guoddevaš doaimmas.

Mearkagálvovuoruheapmi galgá leat mielde doarjume dieđuid gaskkusteami sámi kultuvrra, eallinvuogi ja eallinvuođu birra, nu go juo dál gaskkustit gussiide. Davvi Siida AS:s leat olu guossit iešguđet našuvnnain, ja lea álo vuovdán duoji ja iežas designa, muhto dássážii eai leat doarvái bargan dáinna osiin doaimmas.

Sámediggeráđđi Berit Marie P. E. Eira (JSL) lea ilus go sámediggeráđđi sáhttá doarjut dán prošeavtta.

– Duodji lea unna, muhto dehálaš árbevirolaš sámi ealáhus, ja lean hui ilus go duodjefitnodagat vuoruhit viiddidit márkana, dadjá Eira.

127 500 ruvdnosaš doarjja addo doarjjaortnegis Duodji: Márkanheiveheapmi/Márkanfievrredeapmi. Doarjjaortnega mihttu lea ahte duodjefitnodagaid ámmátlašvuohta ja dienas buoriduvvo, ja sáhttá oažžut doarjaga rekrutteren ja vuovdima ovddideaddji doaibmabijuide. Doarjjaortnegis lea rabas ohcanáigemearri gitta skábmamánu 1. beaivvi rádjai dán jagi.