Nord-Norsk Dronetjeneste AS lea Eljasnjárggas (Storsteinnes) Báhccavuona suohkanis ja fállá kárten-, geográfalaš dieđuid čoaggin-, eananmihtidan- ja dárkkistanbálvalusaid. Sii leat ohcan doarjaga ovdánahttit ja ásahit dárkilis drona- ja eananmihtidanbálvalusaid guovllus. Dákkár bálvalusat buktet stuora lassiváikkuhusaid, go báikkálaš fitnodatolbmot sáhttet sin doarjagiin fállat eará ja buoret bálvalusaid. Dasa lassin beavttálmahttá dat eanet proseassaid ja geahpeda ollislaš goluid ollu prošeavttain.

Ulbmilin lea sáhttit fállat drona- ja eananmihtidanbálvalusaid jagi 2025 mielde ja viiddidit fitnodaga juo 2025:s vel golmmain bargosajiin.

– Dát veahkehivččii nannet teknologalaš ovdáneami ja innovašuvnna Davvi-Norggas, seammás go dat ásahivččii ođđa bargosajiid ja ovddidivččii bistevaš ealáhusovdáneami. Mun illudan čuovvut dán prošeavtta ovdáneami ja daid buriid váikkuhusaid mat das leat guvlui, dadjá sámediggepresideanta Silje Karine Muotka (NSR).

290.000 ruvnno doarjja addojuvvo doarjjaortnegis máŋggabealálaš ealáhusaide, vuoruheami vuolde Doaibmabijut mat addet mearkkašahtti ođasmahttima ja fitnodatovddideami.