Lullisámi artista ja juoigi Marja Helena Fjellheim Mortensson lea bargamin viđat skearruinis, mii almmuhuvvo 2024 giđa/geasi. Mortensson lea bures sajáiduvvan artista, geas lea riikkaidgaskasaš beaggin. Dát šaddá su goalmmát skearru mas son čuojaha ovttas trioinis. Trios leat son ieš, Daniel Herskedal ja Jakop Janssøn. Sámediggeráđđi doarju buvttadeami ja báddema 205 000 ruvnnuin.

Maŋŋá lihkostuvvan konseartta "Opprør i Operan" Norgga Opera ja Ballet váldolávddis njukčamánus, lea joavku ISÁK vuolgime geasseturnéai. Konsearta lea boktán beroštumi riikkaidgaskasaččat, ja joavku lea sajáiduvvan riikkaidgaskasaš lávdái ođasmahttojuvvon sámi musihkain. Sámediggeráđđi doarju prošeavtta 200 000 ruvnnuin.

Ubmisámi artista Katarina Barruk lea maiddái geasseturnéai, ja sus leat máŋga konseartta diŋgojuvvon Norggas ja guokte Suomas. Maŋŋá buori skearroalmmuheami giđđat čuovvovaš konsearttaiguin, de lea dát dego nubbi oassi almmuhan-turnéas, gos son galgá čuojahit lávlagiid kritihkkárrámiduvvon skearrus Ruhttuo. Barruk lea sajáiduvvon sámi artista, ja musihkas lea čielga gullevašvuohta sámiid juoiganárbevirrui ja kultuvrii. Sámediggeráđđi doarju prošeavtta 100.000 ruvnnuin.

- Festiválaoasseváldit miehtá riikka besset dán jagi vásihit sámi musihka mas lea erenoamáš buorre kvalitehta. Mis lea juoga masa illudit, ja beassat gullat sihke árbevirolaš sámi musihka ja ođđaáigásaš jiena, dadjá sámediggeráđđi Maja Kristine Jåma (NSR). 

Juolludusat addojuvvojit Luohti ja sámi musihkka doarjjaortnega bokte. Doarjjaortnega mihttomearri lea ahte sámi musihkkariin ja artisttain leat buorit eavttut ovddidit iežaset buvttademiid ja gelbbolašvuođa. Doarjjaortnegis lea rabas ohcanáigemearri juovlamánu 1. b. 2023 rádjai.