Fjordhuldra til Han Lyder lea aitto álggahuvvon ovttaolbmofitnodat Dáigevuonas Davvesiidda gielddas, ja eaiggát lea Linn Mørch Lyder. Sámediggeráđđi juolluda 300 000 ruvnno oastit bivdofatnasa ja bivdoneavvuid. Ulbmil lea guolástit ja bivdit guliid ja gonagasreappáid Dáigevuonas, mii lea mearrasámi gilli olggumusas Lágesvuonas. Dáinna ásahemiin háliida guolásteaddji leat mielde nanneme báikkálaš industriija dakko bokte ahte lasihit leveránssaid, mii sihkkarastá báikkálaš bargosajiid.

Forsberg AS:ii, Emma-Victoria Forsberg bokte, Gáhpevuonas Davvenjárgga gielddas juolluduvvo 275 500 ruvdnosaš doarjja vuosttaš geardde oastit bivdofatnasiid, bivdosiid ja reaidduid. Fitnodaga ulbmil lea álgit veahážiid mielde bivdui vai dađistaga sáhttá stuorrut ja šaddat stuorábun eanet bargiiguin ja sierra eriin.

Sjur Olsen, ovttaolbmofitnodat Vándarvágis (Vannvåg) Gálssa suohkanis, oažžu 300 000 ruvnno doarjjan vuosttaš geardde háhkat bivdofatnasa, bivdosiid ja reaidduid. Son háliida ásaiduvvat guolásteaddjin iežas fatnasiin ja álggahit ollesáigásaš gánnáhahtti bivdodoaimma. Dat ii dušše lasit su iežas ássanhálu, muhto maiddái buoridit barggolašvuođa ja oččodit eanet bargosajiid suohkanii.

Sámediggeráđđi juolluda maiddái 100 000 ruvnno doarjjan 2023 nuoraidguolásteapmái Gáŋgaviikka gielddas. Gáŋgaviikka nuoraidguolásteapmi lea ožžon ollu rámi. Lea nu organiserejuvvon ahte gielda láigoha fatnasa ja bálkáha skiipahoavdda, ja berošteaddji nuorat besset leat mielde bivdime iežaset eriid. Ovdamunni lea ahte eambbo nuorat sáhttet searvat guolásteapmái, sii ožžot gelddolaš geassebarggu čeahpes bagadallama vuolde, seammás go oahpásmuvvet guolástusámmáhii. Nuoraidguolásteami geažil leat eanet nuorat gielddas válljen guolásteami fidnun dahje váldán eará maritiibma oahpu.

– Mii leat ilus go sáhttit doarjut dáid investeremiid, ja doaivut ahte doarjagat bisuhit ja lasihit barggolašvuođa mearrasámi servodagain, dadjá sámediggepresideanta Silje Karine Muotka (NSR).

Doarjagat oktiibuot 975 500 ruvnno ovddas addojuvvojit doarjjaortnegis Doarjja vuođđoealáhusaide - Mariidna ealáhusat. Doarjjaortnega mihttomearri lea ahte mariidna ealáhusat bisuhit ja lasihit barggolašvuođa mearrasámi servodagain. Doarjjaortnegis lea rabas ohcanáigi gitta skábmamánu 1. beaivvi 2023 rádjai.

– Sámediggi háliida ahte eanebut álggášedje guolástusealáhussii, ja danne lea mis doarjjaortnet mii movttiidahttá háhkat fatnasiid ja álggahit riddolagaš guolásteami, dadjá sámediggepresideanta.