Jáhkoš Lásse/Lars Jacobsen Hætta lei mielde Guovdageainnu stuimmiin 1852:s ja son dubmehalai jápmimii, muhto duopmu rievdaduvvui eallinagiduopmun. Daid jagiid go čohkkái giddagasas son duddjui ollu smávvadávviriid muoras mat govvidit boazosápmelaččaid eallima ja neavvuid. Dávviriid čuvvot maid dieđut, earret eará leat dieđut lávu birra ja movt dat geavahuvvo, iešguđet lágan bohccuid ja reaidduid birra, ja gárvvuid birra. Stuora oassi dáin dávviriin leat dál museain, sihke sisriikkas ja olgoriikkas.

Guovdageainnu gilišillju lea sámi dáidaga, kultuvrra ja historjjá musea ja dat lea oassi RiddoDuottarMuseain. Sii áigot dál čájehit Jáhkoš Lásse dávviriid, ja sis lea šiehtadus Pitt Rivers Museum Oxford universitehtas Englánddas dávviriid luoikkaheamis.

Dávvirat mat fievrreduvvojit Pitt Rivers Museas Guovdageidnui galget leat oassin bistevaš čájáhusas maid gilišillju lágida.

Lea vuosttaš geardi go Guovdageainnu gilišillju beassá duohtandahkan čájáhusa dávviriiguin mat galget boahtit ruoktot maŋŋá go leat čájehuvvon ja vurkejuvvon eará báikkiin máilmmis, ja lea vuosttaš geardi go besset ráhkadit čájáhusa Jáhkoš Lásse dávviriiguin su ruovttubáikkis Guovdageainnus.

– Lean hui ilus go Sámediggi sáhttá leat mielde váikkuheame dasa ahte Jáhkoš Lásse dávviriid besset čájehit su ruovttubáikkis. Dávviriin lea stuorra servodatlaš ja kultuvrralaš mearkkašupmi báikkálaš birrasii, muhto maiddái Sápmái oppalaččat, dadjá sámediggeráđđi Ole-Henrik Bjørkmo Lifjell (NSR).

Gitta 230 572 ruvdnosaš doarjja addo doarjjaortnegis Ásahusovddideapmi, ja gullá vuoruheapmái “Proseassat ja prošeavttat máhcahanproseassaid oktavuođas”.