– Áibbas dohkkemeahttun ahte boazodoallit Romssas ja Finnmárkkus eai oaččo máksojuvvot doarjaga mearriduvvon beaivái

– Áibbas dohkkemeahttun ahte boazodoallit Romssas ja Finnmárkkus eai oaččo máksojuvvot doarjaga mearriduvvon beaivái

Sámediggeráđđi Hans Ole Eira (Gb) ballá Romssa ja Finnmárkku boazodolliid ruhtadiliin go doarjagiid máksin maŋiduvvo dán jagi maid. 

Hans Ole EiraBoazoeaiggádat Nordlánddas, Trøndelágas ja Hedemárkkus leat ožžon máksojuvvot doarjaga áigemeari sisa. 

Eira lohká ahte dat orru šaddame jahkásaš váttisvuohtan Romssa ja Finnmárkku stáhtahálddašeaddjái ja dasa ferte gávdnot čoavddus.

– Lea nu ahte boazodoalloealáhusas lea leamaš guohtunroassu dán dálvvi ja vaikko boazoeaiggádat leat ožžon liigeruđa fuođđarii, de lea guohtunroassu dagahan lasi ja eahpečielga goluid boazodolliide, lohka Eira.

Dán jagi lea lassin guohtunrossui boaldámušhaddi maid loktanan.

– Fuolastuvan go doarjja mii lea dehálaš boazoeaiggádiidda vai sáhttet háhkat dárbbašlaš diŋggaid ja máksit rehkegiid maŋŋel roassodálvvi ii boađe, dadjá Eira.

Romssa ja Finnmárkku stáhtahálddašeaddji lea dieđihan ahte doarjaga máksin maŋŋona máŋggain vahkkuin.

– Sámediggi lea bivdán čilgehusa Stádahálddašeaddjis manne doarjaga máksin lea maŋŋonan. Jus leat seamma hástalusat go ovdalaš jagiid, de ferte dasa gávdnot čoavddus dán jagi vai seamma ii dáhpáhuva boahtte jagi maid, dadjá Eira.

Son lohká ahte doarjjaohcamat ja doarjagiid máksin lea jahkásaš bargu mii ferte vuoruhuvvot, nu ahte dat ii čuoza boazoeaiggádiidda juohke jagi.

– Boazoeaiggádat fertejit maid oažžut fásta máksindáhtona, vai boazodoalus lea diehttelasvuohta. Dat lea diehttalasvuohta eanadoalus ja nu ferte maid šaddat boazodoalus. Romssa ja Finnmárkku stáhtahálddašeaddji berre árvvoštallat dán oktavuođas ahte sis leat bargit geasset maid, jus juo ležžet unnán olbmot stáhtahálddašeaddjis, dadjá Eira.

Sámediggeráđđi áigu čuovvulit dán ášši, ja geahččalit váikkuhit dasa ahte dákkár eahpesávahahtti dilli maŋŋonan máksimiiguin ii čuožžil boahtteáiggis.

Jearahallama addá ja gažaldagaid vástida sámediggeráđđi Hans Ole Eira (GB). +47 918 61 471, hans.ole.eira@samediggi.no