Sámediggeráđđi Mikkel Eskil Mikkelsen ja máhttoministtar Kari Nessa Nordtun Máhttodepartemeanta/Martin Siewartz Nielsen

Ikte dollojuvvui jahkebeallásaš čoahkkin gaskal máhttoministara Kari Nessa Nordtuna ja sámediggeráđi Mikkel Eskil Mikkelsen (NSR).

Sámediggeráđđi ja stáhtaráđđi leat álggahan fásta čoahkkimiid juohke jahkebeali. Čoahkkima fáddán lei earret eará mánáidgárddiid ja sámi gáiddusoahpahusa áššedovdijoavku.

Sámedikki evttohusa vuođul áigu ráđđehus nammadit áššedovdijoavkku mii galgá geahčadit mo sámi mánáid mánáidgárdefálaldaga sáhttá buoridit. Sámi mánáidgárdefálaldat lea okta dain buot deaŧaleamos doaibmabijuin sámi giela ja kultuvrra nannemis ja ovddideamis. Máhttodepartemeanta galgá dál álggahit ráhkkananbarggu ja háliida gulahallat Sámedikkiin sihke mandáhta birra ja evttohusaid birra vejolaš kandidáhtaide geat sáhttet čohkkát dán joavkkus.

Gáiddusoahpahus lea guovddáš oassi sámegieloahpahusas ohppiide miehtá Norgga. Sámediggi, Máhttodepartemeanta ja Oahpahusdirektoráhta čađahedje cuoŋománu 29. b. gulaskuddančoahkkima Romssas gáiddusoahpahusa birra. Árvalusat čujuhit ollu hástalusaide.

Máhttodepartemeanta áigu ovttasráđiid Sámedikkiin ráhkadit bargamušreivve Oahpahusdirektoráhtii (Udir) vai sáhttá háhkat dieđuid gáiddusoahpahusa birra ja ráhkadit strategiija mo buoridit gáiddusoahpahusa kvalitehta. Sámediggi áigu maid ovttasbargat Udir:in dán barggus.

– Sámediggi ja Ráđđehus digaštallet dál guokte guovddáš oasi sámi mánáid oahppofálaldagas. Jus mii lihkostuvvat dainna bargguin, de dat sáhttá mearkkašit ollu sámi mánáide ja sámegielaid boahtteáigái. Mun lean duhtavaš go ráđđehus maiddái oaidná ahte lea dárbu ásahit áššedovdijoavkku ja ahte lea dárbu eanet ollislaččat bargat sámegiela gáiddusoahpahusain. Dan mun illudan čuovvolit viidáset ovttasbargguin, dadjá sámediggeráđđi Mikkel Eskil Mikkelsen.

– Ráđđehusas lea čielga áigumuš nannet sámi giela ja kultuvrra. Mii diehtit ahte okta dain deaŧaleamos doaimmain maid mii sáhttit dahkat gáhtten dihtii sámegiela, lea diktit mánáid oahppat ja geavahit sámegiela mánáidgárddis. Hástalussan odne lea oažžut doarvái oahppan oahpaheaddjiid ja mánáidgárdeoahpaheddjiid geain lea sámegiel máhttu. Danne mii áigut nammadit áššedovdijoavkku mii áigu geahčadit mo sámi mánáidgárdefálaldaga sáhttá buoridit vai vel eanet mánát sáhttet oažžut buori sámi mánáidgárdefálaldaga, dadjá máhttoministtar Kari Nessa Nordtun (Bb).

Ikte dollojuvvui jahkebeallásaš čoahkkin gaskal máhttoministara Kari Nessa Nordtuna ja sámediggeráđi Mikkel Eskil Mikkelsen (NSR). Máhttodepartemeanta/Martin Siewartz Nielsen