Anne Toril Eriksen Balto Sámediggi

– Lea leamaš stuorra illun beassat ovttasbargat Anne Torilain sihke Muohtačalmmit-ráđis ja Beaiveálgu-ráđis, dadjá sámediggepresideanta Silje Karine Muotka (NSR).

Anne Toril Eriksen Balto lea virggis politihkalaš ráđđeaddin gitta suoidnemánu 17. beaivái 2023.

– Mun giittán su ollu ráđđeaddi barggu ovddas, ja sávan Eriksen Baltoi lihku ođđa ja deaŧalaš virggis SÁNAG:s. Mii diehtit ahte dán jođiheaddjibarggus lea stuorra mearkkašupmi sámi servodahkii, dadjá Muotka.

Sámediggepresideanta Muotka almmuha ođđa politihkalaš ráđđeaddi álbmogii gaskavahku borgemánu 23. b. Kárášjogas sámediggeráđi čoahkkima oktavuođas.  Ođđa ráđđeaddis lea gullevašvuohta Guovddášbellodaga sámediggejovkui.