Sámevašši lea dalle go sámiid vuostá leat negatiivvalaš gáttut, cealkámušat ja dagut, duššefal dan dihte go lea sámi identitehta. Vašši ja vealaheapmi sáhttá vuhttot sihke digitálalaččat ja muđui servodagas cielaheami bokte. Eandalii sámi mánáin ja nuorain lea rašes dilli.
Jagis 2022 Sámediggi buvttii doaibmaplána sámevaši vuostá (2022-2025). Doaibmaplána lea lokten dán ášši ja oahpahan midjiide eambbo sámevaši birra, ja veahkehan min oaidnit movt mii galgat bargat sámevaši vuostá. Sámediggeráđi mielas lea dattetge dárbu bargat ulbmillaččat vai dilli buorrána guhkit áigái.
– Go mii bargat sámevaši vuostá, de mii bargat oadjebasvuođa ja ovttadássásašvuođa ovddas. Mii leat gal olu bargan maŋemus jagiid, muhto sámevašši lea ain servodatváttisvuohta mainna mii fertet bargat, cealká sámediggeráđđi Ann-Elise Finbog (SáB).
Boasttudieđut leat hástalussan
Ann-Elise Finbog
Per Heimly/Sámediggi
Sámediggeráđđi oaidná ahte boasttudieđut ja konspirašuvdnateoriijat sámi dilálašvuođaid birra lassánit. Dušši ságat sáhttet nannet negatiivvalaš guottuid ja sámevaši. Sámediggeráđđi áigu boasttudieđuid vuostá bargat ja bidjat dan sierra áŋgiruššansuorgin 2030 rádjái.
– Boasttudieđut ja konspirašuvdnaságat sámi dilálašvuođaid birra sáhttet lasihit ovdagáttuid ja sámevaši. Juste danne fertet mii vuoruhit bargat daid boasttudieđuid vuostá mat leat digitála arenain, cealká Finbog.
Barggus lea ávki
Sámevašši lea dohkkehuvvon váttisvuohtan riikkadásis. Raporta čájeha ahte barggus lea ávki. Dál lea ásahuvvon riikkadási doaibmaplána sámevaši ja vealaheami vuostá 2030 rádjái. Lea maid ásahuvvon sierra áittardeaddjidoaibma Dásseárvu- ja vealahusáittardeaddjis, ja lea ásahuvvon interneahttabáiki samehets.no.
Čieža vuoruhuvvon áŋgiruššamat 2030 rádjái
Sámediggeráđđi evttoha čieža vuoruhuvvon áŋgiruššamiid:
- Mánáid ja nuoraid oadjebas bajásšaddanbiras
- Boasttudieđut ja digitála arenat
- Politiija ja riektesihkkarvuohta
- Bissovaš áittardeaddjidoaibma
- Máhttovuođđu ja dutkan
- Oahppu ja gelbbolašvuohta
- Cealkinkultuvra, siskkáldas cielaheapmi ja demokráhtalaš arenat
– Ulbmi lea ahte sámit galget sáhttit seavat servodatdigaštallamiidda, geavahit identitehtaset ja buktit oaiviliid almmá cielaheami ja balu haga. Juste danne fertet bargat sámevaši vuostá maiddái boahttevaš jagiid, cealká Finbog.
Loga áššeovddidusa dáppe.