Ráhkadit bagadusa das movt váidit sámecielaheami lea okta 17 doaibmabijus Sámedikki doaibmaplánas sámecielaheami vuostá, maid Sámedikki dievasčoahkkin mearridii ovttajienalaččat 2022:s. Dát doaibmabidju lea dál duohtandahkkon neahttasiiddu samehets.no bokte.
– Hui ollu sápmelaččat vásihit sámecielaheami. Liikká váldet unnán olbmot oktavuođa politiijaiguin, Dásseárvo- ja vealahanáittardeddjiin ja eará almmolaš ásahusaiguin sámecielaheami birra. Okta dain máhcahagain maid oaččuimet sámi servodagas go vieččaimet árvalusaid Sámedikki doaibmaplánii sámecielaheami vuostá, lei ahte olbmot eai riekta diehtán makkár vuoigatvuođat ja vejolašvuođat sis leat. Samehets.no-siidu lea min vástádus dán hástalussii, dadjá sámediggeráđđi Runar Myrnes Balto (NSR).
Neahttasiidu lea sápmelaččaid várás geat leat vásihan sámecielaheami, ja neahttasiidu bagadallá maid sáhttá dahkat iešguđet dilálašvuođas. Bagadus váldá vuolggasadjin iešguđetlágan arenaid gos sáhttá vásihit sámecielaheami: digitálalaččat, barggus, skuvllas, medias, go deaivvada almmolašvuođain ja eará sajiin. Viidáseappot addá neahttasiidu dieđuid fáttáid birra, nugo mii sámecielaheapmi lea, maid láhka cealká, movt hupmat mánáiguin sámecielaheami birra, ja oppalašgova bálvalusain mat sáhttet addit rávvagiid, bagadallama ja dieđuid. Nu sáhttá neahttasiidu leat ávkkálaš buohkaide geat dárbbašit dieđuid sámecielaheami fenomena birra.
Sámediggi lea lávga ovttasbargan Politiijadirektoráhtain neahttasiiddu ráhkadeamis. Siiddus lea earret eará sierra bagadus dutnje gii áiggut váidit sámecielaheami politiijaide ja filmmat maid politiijat leat ráhkadan vašširihkkosiid birra, váidima birra ja politiijaid cavgilanfunkšuvnna birra.
– Politiijadirektoráhta lea ilus go sáhttá ovttasbarggu bokte Sámedikkiin addit rávvagiid ja bagadallama sidjiide geat vásihit sámecielaheami. Sámecielaheapmi fátmmasta iešguđetlágan cealkámušaid ja daguid, main muhtin ráje sáhttá maiddái lohkat vašširihkolašvuohtan. Politiija háliida veahkehit álbmoga šaddat eanet dihtomielalažžan sámecielaheami birra, ja mo mii servodahkan dustet dán servodathástalusa. Mii sávvat ahte samehets.no šaddá dehálaš veahkkin dasa, dadjá politiijadirektoráhta ossodatdirektevra Bjørn Vandvik.
Neahttasiidu samehets.no almmuhuvvo cuoŋománu 24. beaivvi 2024 dii. 12.30 Sámedikki girjerádjosis Kárášjogas.
Doalut sáddejuvvojit njuolga Sámedikki neahtta-TV:s.
Loga Sámedikki doaibmaplána sámecielaheami vuostá