Árbedieđu bargojoavku bivdá berošteddjiin oaiviliid árbedieđu bargguid birra

Árbedieđu bargojoavku bivdá berošteddjiin oaiviliid árbedieđu bargguid birra, ja bivdá ásahusaid/ovttaskas olbmuid váldit oktavuođa.

Sámediggi lea 2019 nammadan árbedieđu (árbevirolaš máhtu) bargojoavkku. Bargojoavkku ásaheapmi lea čuovvoleapmi ovddeš árbediehtobargguin mii čájehii ahte lea dárbu gulahallamii gaskkal ásahusaid geain lea árbediehtu sin bargosuorggis.

Bargojoavku galgá geiget raporttas Sámediggeráđđái njukčamánu 19. beaivvi 2021.

Bargojoavku bivdá dál ásahusaid/berošteddjiid geat barget árbediehtosuorggis váldit singuin oktavuođa dán barggu hárrái.

Jođiheaddji: Anne-May Olli, RiddoDuottarMuseat, amo@rdm.no, 40601986
Nubbinjođiheaddji: Harrieth Aira, Árran, harrieth.aira@arran.no, 99047356
Kjellaug Isaksen, Davviálbmogiid guovddáš, kjellaug@nordligefolk.no, 47370934
Solveig Joks, Sámi allaskuvla, solveig.joks@samiskhs.no, 90724669
Svanhild Andersen, Mearrasiida, svanhild.andersen@mearrasapmi.no, 95791356

​Bargojoavkkus leat leamaš gulahallančoahkkimat aktevrraiguin lullisámi guovllus, muhto háliida oaiviliid eanemus lági mielde vejolaš aktevrrain, geaid bivdit váldit oktavuođa njuolga bargojoavkku lahtuiguin, dahje bargojoavkku čállingottiin, eboastta bokte aod@samediggi.no.

Bargojoavkku mandáhtta

Árbedieđu bargojoavku galgá čielggadit árvalusaid boahtteáiggi árbedieđu hálddašeamis. Bargojoavku galgá earret eará árvalit árbedieđu boahtteáiggi organiserema ja aktevrraid rolla ja ovddasvástádusa. Bargojoavku galgá maiddái árvalit boahtteáiggi hálddašeami vejolaš ruhtadanortnega. Biddjo vuođđun ahte bargojoavkkus lea gulahallan árbedieđu áššeguovdilis aktevrraiguin. Sámediggeráđi 2016 čilgehus lea vuođđun joavkku bargui.

Loga Sámediggeráđi čilgehusa árbedieđu birra (PDF, 345 kB)

Almmuhuvvon 17.09.2020 12.56
Maŋemusat rievdaduvvon 18.09.2020 08.36