Árval Sámedikki giellaloktenbálkkašumi vuoiti!Árval priváhta olbmo, joavkku, doaimmahaga dahje organisašuvnna mii vuohkkasit geavaha ja čalmmustahttá sámegiela(-id) beaivválaš doaimmas. Sámedikki giellaloktenbálkkašumi vuoiti oažžu 30.000 ruvnno ja dáiddadiploma. Sámediggi jugii giellaloktenbálkkašumi vuosttaš geardde 2019:s, ja dál juohká bálkkašumi goalmmát geardde 2022:s Giellavahku oktavuođas. Juohkehaš sáhttá evttohit gii berrešii vuoitit giellaloktenbálkkašumi. Sámedikki ráđđelahtut ja hálddahusbargit eai sáhte oažžut bálkkašumi. Ákkastala oanehaččat árvalusat čálalaččat ja sáddes Sámediggái ovdal čakčamánu 9. beaivvi. Sámediggeráđđi mearrida gii oažžu bálkkašumi. Bálkkašupmi geigejuvvo Giellavahku rahpandoaluid oktavuođas golggotmánu 23. b. Snåases. Árvalusaid sáddet deike: samediggi@samediggi.no Almmuhuvvon 29.08.2022 12.47 Maŋemusat rievdaduvvon 10.11.2023 12.40