Duohtavuođa- ja seanadankommišuvnna raportta čuovvoleami oktavuođas mearridii Sámediggi diibmá doallat gulaskuddamiid ja gulahallančoahkkimiid buot válgabiirriin. Ulbmil lea báikegottiin ja ovttaskas olbmuin gullat mat sámi fálaldagaid ja ortnegiid dárbbašuvvojit sin lagas birrasis.

Vuosttaš gulaskuddanproseassa leat čađahan dál giđđat Davveguovllu válgabiirres. Gulaskuddanproseassa lea dan ášši vuođđun man sámediggeráđđi dál ovddida Sámedikki dievasčoahkkimii geassemánus Davveguovllu válgabiirre fálaldagaid birra.

– Dáruiduhttin garrasit čuozai Davveguovllu válgabiirii, muhto dáruiduhttin ii lihkostuvvan ollásit. Mii oaidnit ahte válgabiirres lea dáhttu ealáskahttit ja nannet mearrasámi suopmaniid, kulturdovdomearkkaid, identitehta ja ealáhusaid. Danne mii háliidit doarjut báikkálaš áŋgiruššiid ja veahkehit dustet dárbbuid mat sis leat iežaset báikegottiin, dadjá sámediggeráđđi Runar Myrnes Balto. Son joatká:

– Mii áigut áŋgirit bargat ođđa deaivvadanbáikkiid ásaheami ovdii Hámmerfeasttas, Láhpis ja Ráissas, gos eai leat deaivvadanbáikkit. Dasa lassin áigut Álttá, Návuona ja Davvenjárgga fálaldagaid viidáseappot ovddideami doarjut. Mii fertet čehpet dál hutkat vai oažžut fálaldagaid olles válgabiirii. Danne ávžžuhit ásahusaid ovttasbargagoahtit vai olahit olles válgabiirre, ja mii áigut láhčit dili dasa min ruhtadanortnegiin.

Boahttevaš áššis árvala sámediggeráđđi ollu doaibmabijuid mat nannešedje Sámedikki saji sámi giela, kultuvrra, identitehta ja ealáhusaid ovddideamis Davveguovllu válgabiirres. Sámediggeráđđi maiddái čujuha dasa ahte suohkaniin, fylkkasuohkaniin ja stáhta eiseválddiin lea ovddasvástádus, ja lea árvalan ahte sii bovdejuvvojit searvat dán bargui.

Loga olles ášši dás