Faamoe lea fápmu máttasámegillii ja fokusis lea nannet fitnodagaid mearkagálvvu ja servviid ekonomiijastivrema. Deaŧalaš oassi manne leat mielde Faamoes, lea iežas fitnodaga viiddideapmi, ja dasto beassat deaivvadit earáiguin geat leat seamma dilis.  

– Eará fitnodateaiggádiiguin deaivvadeapmi lea hui deaŧalaš ja singuin geat barget seamma suorggis. Ollugat čohkkájit okto ja barget, danne lea deaŧalaš deaivvadit earáiguin geain lea seamma dilli. Dáin deaivvademiin ásahuvvo ovttasbargu ja máhttu ovddiduvvo mas lea hui stuorra árvu ovttaskas fitnodahkii, dadjá sámediggeráđđi Silje Karine Muotka (NSR).  

Árvu fitnodagas leat govvideaddji Marie Louise Somby, Guovdageainnus eret, ja grafihkalaš hábmejeaddji Karine Kimo Pedersen,  Deanus eret. Goappašagat leaba searvan vuosttaš Faamoe-prográmmii ja ovddit fitnodatovddidanprográmmaide maid Sámediggi lea lágidan.   

Muotka dadjá ahte olles ulbmil Faamoe 1:žiin, masa Árvu searvvai, lei hukset sámi fitnodagaid mat leat njunnošis iežaset suorggis ja mat lihkostuvvet. 

– Mii dárbbašat meinestuvvi sámi fitnodagaid mat čájehit ahte lea vejolaš ásahit birgenvejolaš fitnodaga. Sámedikki ovddasvástádus lea loktet dáid ovdan, danne illudahttá mu go sii galget jođihit Faamoe 2, dadjá Muotka movttegit.  

Son oaivvilda hui deaŧalažžan ahte mii fokuseret iežamet fitnodagaid nannemii dán eahpesihkkaris dilis mii dál lea.

– Mii sávvat ahte dát bargu addá Árvui lassi vejolašvuođaid ja ahte sii daiguin vásáhusaiguin maid sii leat ožžon, leat mielde loktemin eará sámi fitnodagaid, dadjá Muotka loahpas.  

Dat sámi hutkás ealáhusaktevrrat geat háliidit lávket olles bargui fitnodagain oasseáiggebarggu sadjái, berrejit ohcat. Dá lea liŋka ohcanskovvái: https://www.deltager.no/faamoe-sami