Beaivet lei čalmmusteapmi Vensmoenis mii lei erenoamážit  mánáid ja nuoraid várás. Earret eará ledje skuvlaoahppit bovdejuvvon rahpat doaluid luđiin. Artistta Åvla (Ole-Henrik Bjørkmo Lifjell) lávkii maid lávddi ala. Son lea earret eará beaggán sámegielat BlimE!-artistan 2022;is. 

Maŋŋelgaskabeaivvi sirde ávvudeamit rabas doaluide Nordlándda álbmotmeahcceguovddážii gos ledje sáhkavuorut, guoimmuheamit ja njalgga borramuš. Earret eará lei musihkkár Elisabeth Misvær bovdejuvvon guoimmuhit.

Sálat suohkan lahttuduvvui sámegielaid hálddašanguvlui ođđajagimánu 1.b. 2026;as ja lea vuosttaš giellamovttiidansuohkan Norggas. Dat mearkkaša ahte sámegiella ja dárogiella leaba ovttadássásašgielat suohkanis, ja dakko bokte lea sámegielas čielgaset sadji suohkana doaimmain. Dasa lassin lea suohkan geatnegahttán iežas sámi giella- ja kulturfálaldagaid ássiide, ja ásahit arenaid gos olbmot sáhttet deaivvadit sámegielain árgabeaivvis. 

Ávvudeapmi čalmmustahte álggu viiddis, oktasaš áŋgiruššamis sámegiela ja sámi kultuvrra ovddas gielddas. Sámediggeráđđi sávvá ahte eambbo suohkanat movttiidahttojuvvot ohccát šaddan oassin sámegielaid hálddašanguvlui, nu ahte láhčit eambbo mánáide, nuorade ja rávisolbmuide vejolašvuođa deaivvadit, geavahit ja leat rámis sámegielain doppe gos sii orrot.