Sámediggi addá doarjaga duodjebájiide main leat oktasaš duodjedoaimmat, nu ahte eanet duojárat besset bájiin bargat. Eanemusat maid sáhttá doarjjan oažžut lea 50 000 ruvnno, vuolit rádji lea 30 000 ruvnno. Duodjesearvvit main lea oktasaš duodjebádji sáhttet ohcat doarjaga. Doarjjaortnegis lea rabas ohcanáigemearri skábmamánu 1. beaivvi rádjai.
Myrnes Balto ávžžuha duodjeservviid sáddet ohcama dán doarjjaortnegii, seammás go bivdá servviid dahje earáid dieđihit Sámediggái jus háliidivčče eanet oahppat duoji doarjjaortnegiid birra.
– Sámediggi searvá áinnas jahkečoahkkimiidda dahje eará oktavuođaid muitalit vejolašvuođaid birra Sámedikki doarjjaortnegiid siskkobealde duodji ovddideapmái, dadjá sámediggeráđđi Myrnes Balto.
Loga eanet doarjjaortnega Duodji: Duodjebájit birra
Sámedikkis lea áigumuš ovddidit duoji boahtteáiggeguvllot ja geasuheaddji ealáhussan. Iežas dujiid eanet vuovdin stuorát márkaniidda lea guovddážis Sámedikki áŋgiruššamis. Dainna oaivvilduvvo ahte duodjeealáhus nagoda heivehit rievdadusaide ja hástalusaide ealáhusas, ja ahte ámmátlašvuohta, sisaboahtu ja gánnáhahttivuohta ealáhusas buorránit.
Duoji ealáhusšiehtadus lea Sámedikki deaŧaleamos gaskaoapmi dán ealáhusa ovddideamis. Duodjebájiid doarjjaortnet lea ealáhusšiehtadusas. Seamma leat maid doaibmadoarjjaortnet duojáriidda, investeren- ja ovddidandoarjja, ásahandoarjja, čálgoortnegat, vuovdima ovddideaddji doaibmabijut ja doarjja organisašuvnnaide.
Jearahallama addá dahje vástida gažaldagaide sámediggeráđđi Runar Myrnes Balto (NSR), +47 977 73 778, runar.myrnes.balto@samediggi.no