Ollu nuorat leat leamaš Oslos ja oassálastán Fovse-akšuvnnain ja rahčan dan ovddas ahte sámiid olmmošvuoigatvuođat galget doahttaluvvot. 

Guovdageainnu suohkan lea almmuhan nummira gosa nuorat sáhttet riŋget ja sáddet SMS, ja mas deivet buohccedivššára. Sis lea maid leamaš vejolašvuohta váldit oktavuođa suohkandoaktáriin, ja son lea lohkan ahte son áinnas čohkke nuoraid muitalit ja hupmat sin vásáhusaid birra. 

Sámediggeráđđi Myrnes Balto lohká dán buorren ovdamearkan, ja ávžžuha eará gielddaid čuovvolit dán. 

– Mun sávan ahte eará gielddat gos orrot nuorat geat leat leamaš mielde akšuvnnain, čuvvot Guovdageainnu buori ovdamearkka ja láhčet dili buori čuovvoleapmái. Lea deaŧalaš ahte mii eat divtte iežamet nuoraid dovdat iežaset akto go sii bohtet ruoktot maŋŋil go leat dáistalan riektesihkarvuođa ja olmmošvuoigatvuođaid ovddas, dadjá Myrnes Balto.