Kulturdoaimmaid doarjjaortnega bokte juolluduvvo 1 237 930 ruvdno 16 iešguđetge ohccái. Doaimmat maidda addojuvvo doarjja leat earret eará Løvetann bakgårdsfestival, sámi dánsun- ja musihkkamuitalussii ja mánáid- ja bearašfestiválii Romssas. Addojuvvo maiddái doarjja buvttadit bihtánsámi guhkesfilmma “Bunk Bunk”. 

Jon-Christer Mudenia Árvu/Sámediggi

– Bihtánsámegiella lea áitojuvvon giella, ja lea dehálaš váldit dan atnui sihke ođđa ja dálá arenain. Dan dihte leage hirbmat buorre ahte dál ráhkaduvvo guhkesfilbma bihtánsámegillii. Dakkár doaimmat sihke čalmmustahttet ja nannejit giela, ja sáhttet movttiidahttit eambbosiid hállagoahtit dan, dadjá sámediggeráđđi Jon-Christer Mudenia (NSR). 

Doaimmaid ulbmil lea oainnusmahttit sámi gielaid, muitalusaid ja árbevieruid, ja seammás dat maid buktet deaivvadanbáikkiid main sámi kultuvra lea guovddážis, sihke unnebuš ja stuorát báikegottiin. 

Doarjja lea maid addojuvvon lágidemiide NBR riikačoahkkima ja nuoraidčoahkkaneami oktavuođas, ja kurssaide ja doaimmaide mat gusket mearrasámi biebmokultuvrii Gáŋgaviikkas. 

– Juolludeamit čájehit man girjái ja ealas sámi kultureallin lea. Go doarjut sajáiduvvan aktevrraid ja ođđa vuolggahemiid, de leat mii veahkkin nanneme sámi identitehta, giela ja dáiddalaš geahččaladdama miehtá Sámi, dadjá sámediggeráđđi Jon-Christer Mudenia. 

Juolludeamit: