Mearrasiida oažžu 300 000 ruvnno doarjaga man ulbmil lea ovdánahttit vuođđudusa fágalaččat, ja visttiid ja ovttasbarggu dáfus. Vuođđudus sáhttá de láigohit bargolanja Billávuona mearrasámi bajásšaddanguovddáža lahka. Doppe lágidit doaimmaid main olbmot besset oaidnit ja searvat fanasduddjomii, ja searvat giellakafeaide sámi fanasterminologiija birra. Mearrasiida áigu eambbo ovttasbargat RiddoDuottarMuseaiguin ja Jáhkovuona mearrasámi museain, mat servet oahpahallin fanasduddjonprošektii.
– Dát prošeakta ii dušše ovdánahte Mearrasiidda ásahussan, muhto dat maiddái duddjo eambbo ovttasbarggu min ásahusaid gaskkas ja fievrrida máhtu mearrasámi fanasduddjoma birra buolvvaid gaskkas, dadjá sámediggeráđđi Maja Kristine Jåma (NSR), gii sávvá prošeavtta buoridit máhtu ja ipmárdusa árbevirolaš duoji birra.
Davvi álbmogiid guovddáš lea ožžon 150 000 ruvnno prošektii Håvard Larsen – et liv som duojár. Guovddáš lea ožžon fálaldaga váldit sisa guokte čoakkáldaga Håvard Larsena buktagiin, earret eará dan vuosttaš niibbi maid Larsen vuvddii 1980-logus. Dávviriiguin ráhkaduvvo johttičájáhus mainna Larsena doaibma duojárin 40 jagi ávvuduvvo.
Arahavde AS lea ožžon 100 000 ruvnno kulturlágideapmái Ájles iednam – Hellige jord ja konsertii Bägga Ávahávdest – Vinden fra Árahávdi, dan oktavuođas go Bådåddjo lea 2024 kulturoaivegávpot. Lágideapmi ja konsearta čájehit sámi musihkkaárbevieruid girjáivuođa.
Tjihkkom Almmudahka lea ožžon 140 000 ruvnno doarjaga jorgalit girjji Beretningen om et varslet mord julevsámegillii. Girjji lea Gabriel Garcia Márques čállán, ja dat ilmmai ovddemus spánskkagillii.
Emma Elliane Oskal Valkeapää oažžu 112 000 ruvnno doarjaga iežas nuppi skearru almmuheapmái. Valkeapää lea nuorra ja čeahpes artista. Kautomusic AS oažžu 102 000 ruvnno Jan Ole Hermansena skearru almmuheapmái. Hermansen lea guhká bargan musihkkárin ja šuokŋadahkkin. Vårtun musikk lea ožžon doarjaga musihkkajoavkku Gappa geasse- ja čakčaturneai. Doarjja lea 70 000 ruvnno.
– Sámi artisttaid ja musihkkáriid buktagat fállet sámi musihka sihke ođđa ja árbevirolaš hámis, ja jáhkán daid olahit ollu fuomášumi, dadjá sámediggeráđđi Jåma.
70 000 ruvdnosaš doarjja lea juolluduvvon Jakob Filip Janssønii, Luohteárdna-prošektii. Dat lea čájálmas mas sihke musihkka, luohti, animašuvdna, čuovga ja video adnojuvvojit muitalit luođi fámu birra. Čájálmas lea oaivvilduvvon 5–12-jahkásaš mánáide, muhto dat heive olles bearrašii.
Stiftelsen Nordlandsmuseet oažžu 100 000 ruvdnosaš doarjaga ráhkadit musihka filbmii Markens grøde, mii lea filbma mas ii hubmojuvvo, ja mii ilmmai 1921:s. Filbma lea ožžon nama Eadnama sjetto. Prošeakta ovdanbuktojuvvo Hamsundagane kultur- ja girjjálašvuođafestiválas Hábmeris, borgemánu 4. beaivvi 2024:s. Ođđa musihkka hábme filbmii ođđa, sámi jietnagova man ulbmil lea rievdadit geahčči vásáhusa filmma dáfus.
Bodø2024 IKS lea ožžon oktiibuot 300 000 ruvnno spábbačiekčan-cupii Conifa Women’s World Cup 2024 mii lágiduvvo Bådåddjos. 100 000 ruvdno doarjagis lea kulturprográmma váste, ja 200 000 ruvdno ges spábbačiekčan-cupa lágideapmái.
– Illudan go oainnán man ollu iešguđetlágan prošeavttaide ohccojuvvo doarjja min doarjjaortnegiin kulturdoaimmaid váste, ja šaddá somá oaidnit bohtosiid, loahpaha Jåma.