Doarjja lea addojuvvon mariidna ealáhusaid doarjjaortnega bokte, man mihttomearrin lea bisuhit ja lasihit mariidna ealáhusa doaimmaid mearrasámi guovlluin. Sámediggi vuoruha erenoamážit doaimmaid mat nannejit guollevuostáiváldimiid, vuosttašgearddeinvesteremiid ja nuoraid guolástanprošeavttaid. 

Dán áigodaga doarjjaoažžut leat buohkat vuosttaš geardde oastime bivdofatnasa. 

– Go doarjut sin geat vuosttaš geardde galget bivdofatnasa oastit, de váikkuhit mii dasa ahte eambbosat sáhttet bargagoahtit guolástusealáhusain. Dat lea dehálaš vai sihkkarastit doaimmaid riddo- ja mearrasámi servodagain, dadjá sámediggeráđđi Jon‑Christer Mudenia (NSR). 

Rekrutteren ja vuosttašgearddeinvesteremat

Sámediggi atná vuođđun guolástanealáhusa dehálašvuođa sámi kultuvrii, ássamii ja ealáhusdoaimmaheapmái riddoguovlluin. Muhto maŋemus áiggiid leat guollelogut njiedjan, ja smávvaguliid badjelmeare bivdu ja kvohtavuogádaga rievdadeapmi, lea dagahan ahte máŋgga riddoservodagas leat unnon guolástandoaimmat. 

Lea dárbu rekrutteret ođđa guollebivdiid ja doarjut vuosttaš geardde bivdofanasostiid vai bisuha báikkálaš ealáhusdoaimmaid ja vai sihkkarastá ain sámi mariidnaresurssageavaheami. Dan dihte vuoruha Sámediggi doaimmaid mat addet ođđa aktevrraide vejolašvuođa ásahit ja ovddidit guoddevaš guolástanealáhusa. 

– Sámediggi háliida mearrediđolaš doarjagiiguin vuosttašgearddeinvesteremiidda nannet rekrutterema guolástanealáhussii ja váikkuhit ealli riddo- ja vuotnaservodagaide. Min mielas lea hirbmat buorre go oallugat dál válljejit bargagoahtit guolástemiin eallinláhkin, dadjá Mudenia. 

Mariidna ealáhusaid doarjjaortnet lea ohcanládje gitta skábmamánu 3. beaivvi 2026 dii. 15.30 rádjái. Ohcamat meannuduvvojit dađistaga. 

Dát leat ožžon doarjaga