Badjel 2,2 miljovnna ruvnno sámi gielladoaimmaide ja giellaovddidandoaimmaide

Sámediggeráđđi lea dán rádjai dán jagi juolludan oktiibuot 1 530 000 ruvnno čieža prošektii Giellaovddidandoaimmat doarjjaortnegis, ja 713 000 ruvnno doarjjan golmma prošektii Sierra gielladoaimmat lulli-, ubmi-, bihtán-, julev-, nuortalaš- ja márkosámi guovllus doarjjaortnegis.  

Giellaovddidandoaimmat doarjjaortnega mihttomearri lea ahte organisašuvnnat dokumenterejit, ovddidit ja addet oahpahusa sámegielas.

Dán doarjjaortnegis lea addon doarjja golmma sámegielkurssaide rávisolbmuide, okta doarjja báikenamaid čohkkemii ja golbma doarjagat applikašuvnnaid ođasmahttimii, ovddideapmái ja jorgaleapmái. 

Earret eará juolluda sámediggeráđđi 300 000 ruvnno doarjjan ovddidit áibbas ođđa sámegielat mánáidapplikašuvnna “Veahket”, mii galgá nannet mánáid geavaheami ja áddejumi davvisámegielas interaktiiva árgabeaivvimuitalusaid, válljejumiid ja daguid bokte. 

Sámediggeráđđi juolluda maiddái 300 000 ruvnno ođasmahttit Konrad nammasaš applikašuvnna. Dán applikašuvnnas lea vejolaš ohcat olles Konrad Nielsena Lappisk sátnegirjjiid sisdoalu. 

Sierra gielladoaimmat lulli-, ubmi-, bihtán-, julev-, nuortalaš- ja márkosámi guovlluide doarjjaortnega mihttomearri lea ahte giellaguovddážat ja organisašuvnnat nannejit sámegiela lulli-, ubmi-, bihtán-, julev-, nuortalaš- ja márkosámi guovllus.

Dán doarjjaortnegis lea addon doarjja lullisámegiel neahttakursii rávisolbmuide ja ođasmahttit lullisámegielat oahpponeavvuid neahtas. 

Sámediggeráđđi lea maid juolludan 153 000 ruvnno dán doarjjaortnegis Divttasvuona ja Hábmera tjoaggulvisráde/searvegodderáđđái, vai besset čohkket julevsámi konfirmánttaid konfirmánttačoahkkaneapmái Aarbortes, ja prošeakta galgá leat arenan gos aktiivvalaččat galget geavahit sámegiela. 

– Jus sámegielaid galgá nannet, de dat ferte geavahuvvot beaivválaččat. Danne mii doarjut máŋggalágan doaibmabijuid, nugo giellakurssaid, báikenamaid čohkkema, applikašuvnna ovddideami ja jorgaleami. Ulbmil lea ahte sámegiella galgá leat oidnosis eanet ja eanet sajiin, erenoamážit dain digitála sajiin maid mii geavahit beaivválaččat, lohká sámediggeráđđi Maren Benedicte Nystad Storslett (NSR). 

Goappaš doarjjaortnegiid ohcanáigemearri lea skábmamánu 3.beaivvi 2026 dii.15.30. Ohcamat meannuduvvojit dađistaga.

Dát leat ožžon doarjaga:

Språkutviklingstiltak + Samiske språktiltak i sør-, ume-, pite-, lule-, skolte- og markasamisk område (jan-mai 2026)
Ohcci BajilčálaJuolluduvvon      supmi
​​ Giellaovddidandoaimmaid doarjjaortnegis:
​BÁVTTAJOHTGIERA SIIDA Čohkket báikenamaid​190 000 
​9700 GYM AS Sámegiella dearvvašvuođaárgabeaivvis – 9700 Helsearena​40 000 
​BIRGON JA BIRAS SÁMIID SEARVI BERGEN OG OMEGN SAMEFORENING Sámegielkursa Saal 3​200 000 
​UNIQ STUDIESENTER AS Davvisámegielkursa Uniq Studiesenteris Hámmárfeasttas​300 000 
​ABC-COMPANY E-SKUVLA AS Davvisámegielkursa Saal 2 – neahta bokte​200 000 
​SIKKU MEDIA Konrad applikašuvnna ođasmahttin​300 000 
​DITTDESIGN.NO TOM-GREGER KNUTSEN “Veahket” lea nuvttá, sámegielat mánáidapplikašuvdna iOS ja Android várás, mii nanne mánáid davvisámegiela geavaheami ja áddejumi interaktiiva árgabeaimáidnasiid, válljejumiid ja daguid bokte. ​300 000 
​Oktiibuot:​ ​1 530 000 
​ Sierra gielladoaimmat lulli-, ubmi-, bihtán-, julev-, nuortalaš- ja márkosámi guovlluid doarjjaortnegis:
​ABC-COMPANY E-SKUVLA AS Lullisámegielat SAAL 1 – kursa neahta bokte​260 000 
​ABC-COMPANY E-SKUVLA AS ​Åvtese 4 ​300 000 
​DIVTASVUONA JA HÁBMERA TJOAGGULVISRÁDE/TYSFJORD OG HAMARØY MENIGHETSRÅD Sámi konfirmánttadeaivvadeapmi Aarbortes​153 000 
​Oktiibuot:​ ​713 000 
Almmuhuvvon 05.05.2026 14.09
Maŋemusat rievdaduvvon 05.05.2026 14.09

Juogadanboalut