Arctic Pride oažžu 175 000 ruvnno mainna ovdánahttá ja viiddida iežas sámi prográmma festiválavahku oktavuođas Romssas, ja birrajagi doaimmain. Prošeavtta ulbmil lea ahte lágiduvvojit eambbo deaivvadansajit ja doalut queer-sámi ulbmiljovkui.

Prošeavttas háliidit lasihit organisašuvnna fuomášumi sámi gillii, kultuvrii ja servodateallimii. Ovttas iežaset ovttasbargoguimmiiguin áigot heivehit lágidemiid nu ahte daid plánejit ja čađahit queer-sámi aktevrrat, sihke festiválas ja miehtá jagi. Dasa lassin Arctic Pride áigu jorgalit ja heivehit dieđuid organisašuvnna doaimmaid birra vai dat leat sámegillii.

 – Lea deaŧalaš doarjut Arctic Pride sámi prográmma ovddidan dihte máŋggabealatvuođa dainna lágiin ahte sámi giella ja kultuvra maid deattuhuvvojit. Sávan vel ahte dat veahkeha loktet sámi jienaid máŋggabealat identitehtaiguin, dadjá sámediggeráđđi Maren Benedicte Nystad Storslett (NSR).

Davvi álbmogiid guovddáš AS oažžu 150 000 ruvnno ovddidan ja áimmahuššan dihte mávssolaš gelbbolašvuođa gierdogeavaekonomiija, mearrasámi borramušárbevieruid ja guoddevaš borramušvuogádagaid birra.

Guovddáš áigu lágidit guokte bargobáji. Nubbi bargobádji guoská njuovvamii, biergguid riibadeapmái ja varraborramušaid ráhkadeapmái. Nuppi bargobáji fáttát ges leat guoli riibadeapmi, guhppármáli ja eará dorskebuktagiid málesteapmi.

Prošeakta lea Davvi álbmogiid guovddáža, Olmmáivákki skuvlla ja Olmmáivákki eará báikkálaš aktevrraid gaskasaš ovttasbargu.

– Dán prošeavtta lea deaŧalaš doarjut go dat veahkeha viidáset fievrridit mearrasámi árbevieruid, ovdánahttit guoddevaš borramušvuogádagaid ja nannet ovttasbarggu báikegottis, dadjá sámediggepresideanta Silje Karine Muotka (NSR).

Doarjagat juolluduvvojit regionála ovdánahttinprošeavttaid doarjjaortnegis.