Resi Fisk AS oažžu 250 000 kruvnno doarjjan oastit geavahuvvon bivdofatnasa, mii galgá ásahuvvot Nuorta-Finnmárkui. Ohcci háliida vuođđudit ja ovddidit fitnodaga guolásteamis ja vuođđoealáhusain.

Robert Johansen oažžu 227 500 kruvnno doarjjan oastit bivdofatnasa. Johansen háliida beassat orrut Njeareveajis Gáŋgaviikka gielddas, ja maiddái beassat báikkálaččat bivdit Lákkovuonas Deanuvuonas.

Thomas Båhl oažžu 153 000 kruvnno doarjjan oastit bivdofatnasa ja rusttegiid. Båhl háliida ásahit bistevaš bargosaji guolástusas Davvi-Romssa guovllus, ja dasto váikkuhit báikkálaš árvoháhkama.

– Dat leat dehálaš áŋgiruššamat maid mii leat ilus go beassat doarjut. Dat ahte sáhttit veahkehit ovttaskas olbmuid oastit iežaset bivdofatnasa lea mielde ráhkadeamen bistevaš bargosajiid, sihkkarastimin báikkálaš bivdodoaimma ja bidjamin vuođu guoddevaš boahtteáigái guolástusealáhussii, lohká sámediggepresideanta Silje Karine Muotka (NSR).

Doarjagat juolluduvvojit doarjjaortnega Mariidna ealáhusaid bokte.