Maja Kristine Jåma Ørjan Marakatt Bertelsen

Kulturdoaimmaid doarjjaortnegis juolluduvvo oktiibuot 604 368 ruvnno doarjja 12 iešguđet doarjjaožžui. Ruhta veahkeha nannet ja seailluhit sámi kultuvrra, ja ovddidit hutkáivuođa ja áŋgiruššama báikegottiin.  

– Mii leat hui ilus go beassat doarjut lágidemiid. Ruhta veahkeha nannet ja bisuhit sámi kultuvrra, ja maiddái ovddidit hutkáivuođa ja áŋgiruššama min báikegottiin. Šaddá somá oaidnit movt dát miellagiddevaš prošeavttat mat leat ožžon doarjaga ovdánit, dadjá sámediggeráđđi Maja Kristine Jåma (NSR). 

Doarjjaoažžut:

• Norsk Litteraturfestival Sigrid Undset-dagene festivála oažžu 55 000 ruvnno. Festivála háliida ovddidit sámi jienaid ja muitalusaid ollu gehččiide, vai oainnusmahttá man láhkai sámi kultuvra ja davviriikkaid, nationála unnitloguid kultuvrrat leat mávssolaččat.
• Skriften på speilet AS oažžu 20 000 ruvnno podcast-oassái mas galgá leat sáhka sámiid riektevuogádaga geavaheamis, mas deattuhuvvo movt Fovse-aktivistat geavahedje váikkuhangaskaomiid main ii lean veahkaválddálašvuohta stáhta ja riektevuogádaga vuostá.
• Snubba Grendelag oažžu 36 454 ruvnno kulturprošektii Snubba-dagen 2025, man ulbmil lea buoridit guovllu olbmuid diđolašvuođa sámi kultuvrra fámus.
• Levangken tjïelte oažžu 75 000 ruvnno buoridit máhtolašvuođa sámi identitehta birra ja dan dohkkeheamis. Háliidit duođaštit guovllu sámi kulturárbbi ja historjjá girjjiin maid sáhttá atnit gaskkusteapmái.
• O Hætta Film oažžu 30 000 ruvnno sámi oanehisfilmmaid čájeheapmái beassášfestiválas Guovdageainnus.
• Tråanten Saemien Dåeehkie oažžu 56 500 ruvnno sámi čoahkkanemiid várás metodistagirkus Tråantes čuoigama máilmmimeašttirgilvvuid oktavuođas. Háliidit lágidit arena gos sámi kultuvrra ja giela birra muitaluvvo lasihan dihte ipmárdusa ja beroštumi sámi kultuvrii, ja maiddái iešguđet kultuvrraid gaskasaš oktavuođaid huksema dihte.
• Vegard Bjørsmo oažžu 102 500 ruvnno buvttadit lávdečájáhusa/-šovva boahttevaš čuojahanbargguide.
• Stiftelsen Miniøya oažžu 25 000 doarjaga bálkáhit artistta Elle Maija Klefstad Bær ja su musihkkajoavkku čuojahit Miniøya mánáidfestiválas Oslos.
• Stiftelsen Nordlandsmuseet oažžu 25 000 ruvnno bálkáhit artistta Kalle Urheim doallat konseartta Nordlandsmuseetis Bådåddjos.
• Visit Sport oažžu 40 000 ruvnno bálkáhit Intrigue doallat konseartta faláštallanlágideamis Girkonjárggas.
• Ebbestua oaččui 25 314 ruvnno báikkálaš sámi historjjá ja kultuvrra ovddideapmái sámi vahkus 2025.
• Juoigalasat ožžo 113 600 ruvnno «Juoiganjietna festivála» lágideapmái guovvamánus.