Kulturdoaimmaid doarjjaortnegis juolluduvvo 872 130 ruvnno doarjja 13 doarjjaožžui.  

– Mii leat ilus go beassat leat mielde ovddideame sámi kultuvrra dáiguin doarjagiiguin. Lea movttiidahtti oaidnit áŋgiruššama ja hutkáivuođa mii min báikegottiin lea, dadjá sámediggeráđđi Maja Kristine Jåma (NSR).  

Doarjjaoažžut:

• Álgu Elle Sara Oskal oažžu doarjaga gitta 104 520 ruvnno rádjái sámi kulturfálaldahkii sámi ja norgga mánáide Sis-Romssas, mas mánát ohppet sámi kultuvrra ja árbevieruid birra.
• Alta Pride oažžu doarjaga gitta 20 000 ruvnno rádjái sámi artistta bálkáheapmái doaluide jagis 2025.
• Innlandet fylkkasuohkan oažžu doarjaga gitta 82 000 ruvnno rádjái sámi kultureahkediid lágideapmái. Golmmain doaluin áigot ovddidit sámi kultuvrra, buoridit máhtolašvuođa sápmelašvuođa birra, fuomášuhttit veahkaválddálašvuođa ja illasteami, ja maiddái bargat soabadeami ovdii Duohtavuođa- ja seanadankommišuvnna ávžžuhusaid mielde.
• Porsáŋggu sámiid searvi oažžu doarjaga gitta 58 000 ruvnno rádjái bálkáhit Elin Kåvena ja Amund Johnskarenga doallat konseartta Leavnnjas.
• Vuođđudus Ferske Scener oažžu doarjaga gitta 100 000 ruvnno rádjái bálkáhit dáiddáriid iežas prošektii Siida:Bukta, mas háliida earret eará guorahallat movt sámi identitehta ain eallá vaikko leat leamaš historjjálaš vahágat ja dáruiduhttin.
• Vuođđudus Tromsø Internasjonal Filmfestival oažžu doarjaga gitta 57 600 ruvnno rádjái nannen dihte TIFF 2025 sámi ja álgoálbmotperspektiivva nu ahte deattuha álgoálbmogiid davvin, duohtavuođa- ja soabahanbarggu, ja sámi giela ja kultuvrra oainnusmahttimiin.
• Tråanten Saemien Dåehkie oažžu doarjaga gitta 50 000 ruvnno rádjái sámi kulturhistorjjá, muitalanárbevieru ja luođi oainnusmahttimii.
• Ingøy Grendelag oažžu doarjaga gitta 45 000 ruvnno rádjai bálkkáhit sámi girječálliid searvat girjjálašvuođadoaluide Ingøytreffet:s 2025.
• Kievra AS oažžu doarjaga gitta 40 000 ruvnno rádjai lágidit konseartta Hildá Länsman & Tuomas Norvio.
• Porsáŋggu sámesearvi oažžu doarjaga gitta 63 010 ruvnno rádjai lágidit konseartta Leavnnjas sámi artisttain.
• SALAS-Sámi Lágádus ja Aviisasearvi oažžu doarjaga gitta 200 000 ruvnno rádjai searvamii Lillehammer girjjálašvuođafestiválii.
• Veidnes Fiskeforening oažžu doarjaga gitta 20 000 ruvnno rádjai bálkkáhit sámi artistta Veidnes guolástussearvvi 50 jagi ávvudeapmái.
• Juhls Silver Gallery AS oaččui doarjaga gitta 32 000 ruvnno rádjái bálkáhit sámi artistta beassáškonsertii. Sii háliidedje lágidit arena gos dáidda ja kultuvra leat olámuttos Guovdageainnu olbmuide.