Jeunesse Musicals Norway Oslos lea ožžon 100 000 ruvnnu doarjaga Dolvot lávllačállincampa ja taleantaovddideami lágideapmái mii lea nuorra, sámi musihkkáriidda, artisttaide ja buvttadeddjiide. Ella Marie Hætta Isaksen ja JM Norway leat álggahan campa.

Prošeavtta ulbmilin lea ásahit deaivvadanbáikki nuorra sámi musihkkáriidda, láhčit dili hábmenmoktii ja ođđa sámi musihka buvttadeapmái, ja loktet ovdan boahtte buolvva sámi musihkkáriid ja artisttaid.

Inger ja Iver Jåks čoakkáldaga digitaliseren

Sámediggi lea juolludan 180 000 ruvnno doarjjan Inger ja Iver Jåksa vuođđudussii digitaliseret Inger ja Iver Jåksa čoakkáldaga. Inger ja Iver Jåksa vuođđudus hálddaša kapitála, priváhta dáiddačoakkáldaga ja priváhta dokumeantavuorkká mii lea báhcán Inger ja Iver Jåksa maŋis.

Vuođđudus háliida digitaliseret čoakkáldaga, mii lea dehálaš gáldu sámi dáidda- ja kulturhistorjái, vai lea olámuttus buohkaide geat beroštit sámi dáidagis ja Iver Jåksas.

“Dát juolludeamit čájehit oasáža Sámi kulturdoaimmaid girjáivuođas. Lea positiivvalaš ovdáneapmi, erenoamážit sámi kultursuorgái.”

– Maja Kristine Jåma

Buvttadit autenttalaš sámi sisdoalu «Gaupe» spealus

Sámediggi lea juolludan 200 000 ruvnno doarjjan Frostisen Studioi buvttadit autenttalaš sámi sisdoalu Gaupe nammasaš spealus. Gaupe lea 3D máŋggaspealli rollaspeallu maid speallá PC:s dahje konsollas, rabas máilmmis. Spealu ulbmiljoavku leat 13-jahkásaččat.

Spealu historjá dáhpáhuvvá Davvi-Norggas čáhppesrohtu maŋŋel. Speallomáilbmi lea Skievvá-Divttasvuona guovllus.

Gáhttadáiddaprošeakta Porsáŋggu gielddas

Porsáŋggu gielda lea ožžon 100 000 ruvnnu doarjaga prošektii Nordic Create – Tre kulturer i Arktis. Dat lea gáhttadáiddaprošeakta mii galgá oainnusmahttit Porsáŋggu nuoraid sámi, kvena ja dáža identitehta.

Prošeavtta mihttu lea boktit beroštumi dáidagii ja kultuvrii, erenoamážit sámi ja kvena kultuvrra ja historjjá dáfus, ja dat lea maid álbmotdearvvašvuođaprošeakta mii galgá mielddisbuktit gullevašvuođa ja loaktima. Dáiddáris Tegsonis lea prošeavtta dáiddalaš ovddasvástádus.

“Lean ilus go sáhttit iežamet doarjjaortnegiid bokte doarjut dákkár prošeavttaid ja dasto maid veahkehit oainnusmahttit sámi giela, kultuvrra ja identitehta.”

– Maja Kristine Jåma

Doarjagat leat juolluduvvon Sámedikki kulturdoaimmaid doarjjaortnegis. Doarjjaortnega ulbmil lea addit buriid rámmaeavttuid sámi dáiddabuvttademiide ja kulturvásáhusaide.

Gažaldagaid vástida dahje jearahallama addá sámediggeráđđi Maja Kristine Jåma (NSR), mob. +47 472 42 366, maja.kristine.jama@samediggi.no