Fágaođastusa vuordámuš lea ahte skuvla galgá láhčit dili oahppamii dán golmma fágaidrasttideaddji fáttás: álbmotdearvvašvuohta ja eallimis birget, demokratiija ja mielborgárvuohta ja guoddevaš ovdáneapmi.

LearnLab AS oahpponeavvu láhčá dili oahppamii guoddevaš ovdáneapmi fáttás. Eai leat ovdalaččas ráhkaduvvon sámi oahpponeavvut dán fáttás. Oahpponeavvu galgá leat ávkin dasa ahte oahppit ožžot ipmárdusa fáttá hástalusain ja dilemmain, ahte sii oččot ipmárdusa movt sáhttit máhtu ja ovttasbarggu bokte gávdnat čovdosiid, ja ohppet oktavuođaid birra daguid ja konsekveanssaid gaskka.

Oahpponeavvopáhkas galget leat unnimus 100 resurssa vuođđooahpahusa 1.-13. jahkecehkiid váste, gos progrešuvdna mii lea čadnon iešguđetlágan gealbomihttomeriide iešguđetlágan dásiide bidjá vuođu resurssa sisdollui. Oahpponeavvu láktasa fágaide sámegiella, servodatfága, biebmu ja dearvvašvuohta, luonddufága, ROEE, duodji ja musihkka. Resurssat šaddet gávdnamis davvisámegillii, máttasámegillii, julevsámegillii ja dárogillii. Sámedikki doarjja ruhtada resurssaid dan golmma sámegillii.

– Sámediggeráđđi lea movttet go moatti jagi geahčen sáhttit fállat oahpponeavvu mii válddahalla dan fáttá. Dat ahte suodjalit eallima eatnamis ja áimmahuššat dálá olbmuid dárbbu bilitkeahttá boahttevaš buolvvaid vejolašvuođa gokčat iežaset dárbbuid, lea áigeguovdilis fáddá man lea dárbu laktit fágaid rastá olles vuođđooahpahusmanus, lohká sámediggeráđđi Mikkel Eskil Mikkelsen (NSR).

Juolludeapmi juolluduvvo doarjjaortnet suorggis  mii gullá oahpponeavvoráhkadeapmai.