Juolludanortnega Luohti ja sámi musihkka bokte lea Sámediggi juolludan oktiibuot 1 352 940 ruvnnu doarjaga gávcci prošektii mat leat ožžon doarjaga guovvamánu rájes geasi rádjai 2025:s. Prošeavttaid sisdoallu lea ođđa luđiid ja sámi musihka almmuheapmi, musihkkavideo buvttadeapmi ja oainnusin dahkat sámi kultuvrra – earret eará stuorra lávddiin olgoriikkas.

- Hirbmat movttiidahtti oaidnit ahte ná ollugat dáhttot mielde ovddidit ja bajidit sámi giela ja kultuvrra dáiddalaš ovdanbuktimiid bokte. Juoigama ja sámi musihka doarjuma bokte sávvat ahte mii investeret boahttevaš dáiddáriid. Lea vealtameahttun ahte nuorra taleanttat ožžot vejolašvuođa ahtanuššat ja gaskkustit sámi kultuvrra musihka bokte, dadjá sámediggepresideanta Silje Karine Muotka (NSR).

Dát prošeavttat ožžot doarjaga:

• Henrik P. Hætta oažžu 237 000 ruvnnu rádjai doarjaga almmuhit ođđa musihka Sančuariin. Mihttu skearruin lea čalmmustahtti 40-jagi ávvudeami.
• Karlsen Kulturvirke oažžu 75 500 ruvnnu rádjai almmuhit ođđa sámi musihka ja luđiid artistanama Emil Kárlsen bokte. Mihttu lea bajidit sámegiela ja čájehit ahte sámi musihkas gávdnojit iešguđetlágan musihkkastiillat.
• Amundsen Riverwoods Studio oažžu 158 840 ruvnnu rádjai almmuhit luohte- ja ođđaáigásaš musihka-álbuma guovtti Sámi Grand Prix juigiiguin. Mihttu lea buvttadit gávccesadjásaš álbuma ja ásahit juigiid sierra prošeavttain.
• Ailo Production AS oažžu 215 000 ruvnnu rádjai buvttadit musihkkavideo mii galgá govvidit biilamátkki Sámis. Mihttu lea earret eará oainnusmahttit ja ealáskahttit julev- ja davvisámegielaid ámmátlaš musihkkavideo bokte.
• SKADJA STUDIO Magnus Vuolab oažžu 139 000 ruvnnu rádjai almmuhit Sámi Music Guđát čiežain eará sámi artisttaiguin. 
• Arnljot Nordvik oažžu 110 000 ruvnnu rádjai riikkaidgaskasahttit sámi artistta Katarina Barruk. Mihttu lea loktet sámi musihka Norgga lávddiide ja olgoriikka lávddiidege, nu go Roskilde ja Royal Albert Hall.
• Henrik P. Hætta oažžu 167 600 ruvnnu rádjai almmuhit boares luđiid Láhpoluobbalis. Mihttu lea seaguhit ja almmuhit luđiid maid Láhpoluobbala vuorrasat juoigit juiget seailluhan dihtii boares luđiid ja árbevieru jávkamis.
• Stiftelsen Samisk Musikkfestival i Kautokeino oaččui 250 000 ruvnnu rádjai gávdnat artisttaid ja ráhkadit ja almmuhit oasseváldemusihka ja luđiid Sámi Grand Prix  2025 oktavuođas.