Sámedikki bargiin lea guovddáš rolla oahpponeavvuid fágapedagogalaš kvalitehta ja sisdoalu árvvoštallamis, ja oahpponeavvoohcamiid meannudeamis. Vaikko bargoheaitta lea loahpahuvvon, de dat dagaha maŋŋonemiid dán proseassas.

Eanemusat dat čuohcá guovtti stuora oahpponeavvoprošektii: Digitála oahpponevvui guoddevaš ovdáneami birra ja digitála oahpponevvui julevsámegielas vuosttašgiellan 5.–7. jahkecehkiide. Dasa lassin leat 42 oahpponeavvoohcama meannudeamis, muhto bargoheaitaga váikkuhusaid geažil dat eai árvvoštallojuvvo ja vuoruhuvvo plánejuvvon áigái.

Maŋŋoneapmi čuohcá girječálliide maid, ja sáhttá dagahit ahte prošeavttat mat ledje sáhttit oažžut doarjaga, eai sáhte álggahuvvot 2024 čavčča nugo lei plánejuvvon.

Sámi oahpponeavvobuvttadeapmi lea rašši ja dasa eai leat nu ollu resurssat. Sámediggeráđđi Mikkel Eskil Mikkelsen (NSR) deattuha ahte áigot ain vuoruhit oahpponeavvuid.

- Mii leat dieđihan ohcciide dili birra ja sávvat ahte sáhttit meannudit ohcamiid jođáneamos lági mielde, dadjá Mikkelsen.