– Dát lea hui dehálaš prošeakta maid mii leat rámis doarjut. Sámi mánát ja nuorat dárbbašit soapmása geas lea áddejupmi sin kultuvrii, gillii ja eallindillái go deaivvadit riektevuogádagain. Gatejuristena áŋgiruššamiin sii ožžot sorjjasmeahttun doarjjaolbmo gii dovdá sámi servodaga ja hástalusaid mat doppe leat, guldala ja sihkkarastá ahte sin vuoigatvuođat vuhtiiváldot, dadjá sámediggeráđđi Runar Myrnes Balto (NSR). 

Gaterjuristenis lea viiddis ja guhkebuš vásáhus riekteveahkki hárrái hearkkes joavkkuide, ja diehtá man dárbbašlaš juridihkalaš doarjja lea sihkkarastit buori dearvvašvuođa ja dilálašvuođa. Sámediggeráđđi vuordá ahte prošeakta váikkuha oadjebas bajásšaddaneavttuid ja buoret eallineavttuid sámi mánáide ja nuoraide. 

– Riektesystema sáhttá leat lossat, erenoamážit go deaivvadit olbmuiguin geat eai ádde sámi servvodaga. Mun sávan dát áŋgiruššan addá sámi mánáide ja nuoraide dan doarjaga ja riekteveahki maid sii dárbbašit, ja masa sis lea riekti oažžut, dadjá Myrnes  Balto. 

Doarjja juolluduvvo Dearvvašvuođa-, fuolahus- ja mánáidsuodjalusprošeavttaid doarjjaortnega bokte.