– Sámediggi lea konsulteren ráđđehusain láhkaárvalusa birra ja mii eat leat nagodan soahpat. Sámediggái lei dehálaš oažžut ovdan ahte leat máŋga beali mat leat guđđojuvvon láhkaárvalusas, muhto main boahtá leat stuora mearkkašupmi sámi vuoigatvuođaguddiide ja báikkálašservodagaide, dadjá sámediggeráđđi Maja Kristine Jåma (NSR).

Sámediggi čujuhii iežas gulaskuddancealkámušas ahte leat máŋga dilálašvuođa mat fertejit gehččot árvaluvvon láhkarievdadusaid oktavuođas jus galgá sáhttit oaidnit duohta buorráneami sámi vuoigatvuođaid, ealáhusaid ja kultuvrra áimmahuššama ektui bieggafámu ohcamušaid meannudeamis. Dát leat earret eará čavgejuvvon gáibádusat váikkuhusguorahallamii, gažaldagat čadnon guorahallamiid sorjjasmeahttunvuhtii ja hástalusat čadnon ovdagihtiiálgimii (dárogillii: forhåndstiltredelse).

– Konsultašuvnnain leat mii ožžon signálaid ahte ráđđehus áigu dahkat juoidá čuolmmaiguin mat leat čadnon váikkuhusguorahallamiidda ja ovdagihtiiálgimii iežas proseassain. Dáinna oaivvildan mun lea dehálaš boahtit johtui jođánit, ja ahte Sámediggi váldo mielde viidáset barggus, deattuha Jåma.

Sámediggi registrere maid ahte guovloregulerema ásaheapmi mielddisbuktá lasi eiseváldeproseassa, maid guoskkahuvvon sámi vuoigatvuođaguoddit fertejit vuhtiiváldit, man ektui fertejit dahkat mearrádusaid ja masa fertejit searvat. Dát mielddisbuktá lasi noađi sámi vuoigatvuođaguddiide geain dávjá lea unnán hálddahuslaš kapasitehta oassálastimii eiseváldeproseassain.

– Konsultašuvnnain lean ohcalan čielgaseabbo daguid loktet sámi vuoigatvuođaguddiid kapasitehta, vai dat sáhttet oassálastit mearridanproseassain dásseárvosaš oasálažžan. Mu govva lea ahte departemeanttat maiddái oidnet ahte lea dárbu geahčadit dán lagabuidda. Vuorddán ahte jođánit álggahuvvo proseassa gávdnat buoridandoaimmaid resursadilálašvuođa ektui, loahpaha Jåma.

Dá lea láhkarievdadeami árvalus:

Prop. 111 L (2022-2023) – regjeringen.no