Gulaskuddama ulbmil lea čohkket sámi servodaga cealkámušaid ja oaiviliid raportta sisdoalu ja evttohuvvon doaimmaid birra, ja gulaskuddat ahte váilot go makkárge váidudeaddji doaimmat. Duohtavuođa- ja soabadankommišuvnna raporta, mii geigejuvvui Stuoradiggái geassemánu 1. b. dán jagi, lea dehálaš dáhpáhus dan oktavuođas ahte dohkkehit ja adresseret historjjálaš vearrivuođaid ja vearredaguid mat leat dahkkon sámi álbmoga vuostá.
– Lea dehálaš Sámediggái gullat maid sámi álbmot oaivvilda raporta birra. Mii háliidat diehtit gokčá go raporta olles duohtavuođa dáruiduhttima birra? Leat go fáttát dahje áššit mat eai leat oassin raportas? Mii dáhttut láhčit dili vai sámi servodat beassá buktit oaiviliid ja nu váikkuhit soabadeaddji prosessii, dadjá sámediggeráđđi Runar Myrnes Balto (NSR).
Sámediggi háliida ahte oallugat sámi servodagas servet, sihke sámi organisašuvnnat, ásahusat, ovttaskas olbmot ja eará relevánta berošteaddjit. Gulaskuddan addá Sámedikki dievasčoahkkimii viidát vuođu digaštallat ja árvvoštallat raportta, mii meannuduvvo sierra dievasčoahkkináššin.
Raporta lea čohkken váidudeaddji doaibmabijuid viđa stuorit osiide: máhttu ja gaskkusteapmi, giella, kultuvra, riidoeasttadeapmi ja njuolggadusvuođu implementeren. Sámedikki gulaskuddansiiddus leat mii čohkken buot evttohuvvon doaibmabijuid.
– Leat árvaluvvon máŋga doaibmabiju, earret eará nášunala áŋgirruššan čađamanni giellaoahpahus mánaidgárdedásis gitta rávisolbmooahpahussii, nášunala kulturlokten, ja geahčadeapmi das leat go minoritehtapolitihkalaš mearrádusat duohtavuođas álggahuvvon ja čađahuvvon Norggas, dadjá sámediggeráđđi Balto.
Sámediggi ávžžuha buohkaid geat beroštit sámi áššiin ja soabadeamis, aktiivvalaččat searvat gulaskuddamii. Gulaskuddancealkámušaid sádde digitála skovi bokte Sámedikki neahttasiidduin. Lea maiddái vejolaš sáddet cealkámušaid dábálaš poastta mielde Sámedikki poastačujuhussii.
– Min mihttomearri lea sihkkarastit ahte Duohtavuođa- ja soabadankommišuvnna raporta doaibmá nanu ja vuoiggalaš duođaštussan vássánáiggi vearrivuođaide, seammás go bidjá vuođu soabadeaddji prosessii ja sámi vuoigatvuođaid ja servodaga ollislaš nannemii, loahpaha sámediggeráđđi.
Searvva gulaskuddamii
Gulaskuddanáigemearri lea čakčamánu 30. b. 2023.