– Vai mii duođas galgat sáhttit bargat buori barggu dainna ahte evttohit vel buoret válgaortnega, de dárbbašit mii servodaga veahki. Gokko leat hástalusat ja maid sáhttá buoridit? Dasa háliidit mii cealkámušaid, dadjá válgaortnetlávdegotti jođiheaddji Ragnhild Nilsson.

Lávdegoddi lea ožžon mandáhta Sámedikki dievasčoahkkimis. Sii galget earret eará árvvoštallat válgabiirriid, mandáhttajuogu, sámi hálddašanguovlluid ja unnit giellaguovlluid ovddasteami, ja maiddái dássenmandáhtaid ja vuolimusráji. 

– Mii galgat buktit ávžžuhusaid dasa movt válgaortnet buoremusat ovddastivččii Sámi. Danne fertet mii diehtit maid olbmot jurddašit ášši birra. Mii doaibmá bures dál ja maid vejolaččat galggašii rievdadit, dadjá Nilsson. 

Lávdegottis leat postdoavttir Ragnhild Elisabet Nilsson, dutkanprofessor Mikkel Berg-Nordlie, várrerektor Jonas Stein, jurista Line Aimee Kalak ja seniorráđđeaddi Lars Magne Andreassen. Sii galget geiget raporttaset maŋemusat borgemánu 1. beaivvi 2027. 

Cealkámušaid sáhttá e-poastta bokte sáddet lávdegoddái, čujuhussii valgaortnet@samediggi.no, ovdal suoidnemánu 1. beaivvi 2026. 

Válgaortnetlávdegoddi. Lávdegottis leat postdoavttir Ragnhild Elisabet Nilsson, dutkanprofessor Mikkel Berg-Nordlie, várrerektor Jonas Stein, jurista Line Aimee Kalak ja seniorráđđeaddi Lars Magne Andreassen. Dánil Røkke