Guolástus- ja mearraministtar Bjørnar S. Skjæran (Bb) ja sámediggepresideanta Silje Karine Muotka (NSR) Vegar Jakobsen Bæhr/Sámediggi

Sámediggi lea ovdal buktán cealkámušaid dan njealji guovddáš fáddái dieđáhusas mat leat leamaš gulaskuddamis:

• Rámmaeavttut unnimus riddobivdofatnasiidda
• Riddobivdofatnasiid joavkojuohku ja relevánta sturrodatgáržžideamit
• Juohku strukturvuoittus mii boahtá strukturearreortnega nohkan áigegáržžideamis
• Earrejuohku nuortadavvearktalaš dorskis (gođđadorskis) ja norgga giđđagođđi (nvg) sallihis

Buot dát njeallje váldofáttá leat digaštallojuvvon konsultašuvnnain. Sámediggepresideanta lea erenoamážit deattuhan ahte sámi kultuvrra ávnnaslaš vuođđu ferte sihkkarastojuvvot dakko bokte ahte addit unnimus bivdofatnasiidda sámi guovlluin buriid eavttuid, ja ahte strukturvuoitu ferte boahtit buorrin dán fanasjovkui.

Muotka lea maid bivdán ráđđehusa sihkkarastit ahte riddoguolástusortnet viidásetfievrreduvvo várrejupmin mas lea fásta vuolit rádji 3000 tonna, mii váldo “bajemusas” dorskeearrejuohkinproseassas (ovdal nationála earri juogaduvvo feastonuohti ja dábálaš reaidduid gaskkas).

Sámediggepresideanta dadjá ahte sutnje lea leamaš dehálaš buktit cealkámušaid dán stuoradiggedieđáhussii, mas sáhttá šaddat stuora mearkkašupmi sámi riddoservodagaid ovdaneapmái boahttevaš jagiid, muhto ii sáhte dadjat eanet maid ráđđehusain leat šaddan ovttaoaivilii ovdal go mánnodaga konsultašuvdnačoahkkima čoahkkingirji lea gárvvis.