Sámediggi oaččui njukčamánus 2025 dieđiheami Gielda- ja guovlodepartemeanttas (KDD) ahte loatnadáhkádusat Várdobáiki ASii eai leat lobálaččat.
Sámediggi lea jagiin 2017, 2018 ja 2019 juolludan dáhkádusaid loatnaváldimii huksehusaid oastimiidda ja divodemiide. Sámediggi lea okta Várdobáiki AS oasuseaiggádiin. Loatnadáhkádusaid meannudii dáid jagiid dalá sámediggeráđđi. Loatnadáhkidemiid birra lea čállojuvvon daid seammá jagiid Sámedikki jahkedieđáhusain.
– Dán ášši geahčan duođalažžan. Boasttuvuođat áššemeannudeamis, guorahallamis, duođašteamis ja vuođuštusas mearrádussii lea dagahan loatnadáhkádusmearrádusaid eahpelobálažžan, dadjá sámediggepresideanta Silje Karine Muotka (NSR). Sámediggeráđđi berošta das ahte Várdobáiki AS ii gártta dán áššis vahágahttot Sámedikki boasttodaguid geažil.
– Sámediggi áigu buot beliid dán áššit čuvget nu bures go vejolaš, mihttuin njulget boasttuvuođaid. Danne lea sámediggeráđđi mearridan álggahit olgguldas guorahallama loatnadáhkádus-áššiin, ja lea sáddemin ášši Sámedikki bearráigeahččanlávdegoddái, dadjá Muotka.
Sámediggeráđđi lea meannudan ášši cuoŋománu 22. b. 2025, ja ášši biddjojuvvo Sámedikki bearráigeahččanlávdegotti ovdii. Dasa lassin bivdá sámediggeráđđi ahte álggahuvvo olgguldas guorahallan loatnadáhkádus-áššiin, vuođđoáššis jagiin 2017-2019 mat láidejedje mearrádusaide dáhkádusaid hárrái.
Sámediggi lea njukčamánus/cuoŋománus 2025 čađahan siskkáldas geahčadeami, mii konkludere ahte Sámediggi lea rihkkon iežas ekonomiijanjuolggadusaid.
Sámedikki siskkáldas geahčadeapmi jagis 2025 čájeha ahte ášši meannudeamis leat boasttuvuođat áššemeannudeami, čielggadeami, duođašteami ja vuođušteami hárrái. Earret eará bohtet ovdan stáhta ekonomiijastivrema mearrádusaid, Sámedikki ekonomiijanjuolggadusaid ja siskkáldas rutiinnaid rihkkumat.
– Ášši lea duođalaš máŋgga beali dáfus ásahusas. Sihke stáhta ekonomiijastivrema 8. kapihttala njuolggadusat ja min iežamet ekonomiijanjuolggadusat leat rihkkojuvvon. Siskkáldas geahčadeapmi čielgasit čájeha ahte mii fertet buoridit vuogádagaid, ja dan barggu leat juo álggahan, dadjá Sámedikki direktevra Inger Marit Eira-Åhrén.
Sámedikki direktevra Inger Marit Eira-Åhrén lea Riikarevišuvdnii dieđihan ášši birra, ja ásahan bargojoavkku mii galgá šiehtadallat čovdosa man ulbmil lea heaittihit dáhkádusa ja sihkkarastit viidáseappot doaimma ovttas Várdobáikkiin, báŋkkuin(-guin) ja Dielddanuori suohkaniin. Bargojoavku galgá árvvoštallat leago vejolaš Várdobáikki visttiid árvvu/doaimma atnit sihkarvuohtan, ja maiddái árvvoštallat vejolašvuođa máksit loana ja unnidit Várdobáikki njuolggodoarjaga dan mađe go investeremat maidda dáhkádusat gustojit mákset.
– Mis lea čielga ulbmil njulget mearrádusaid mat eai leat gustovaččat ja sihkkarastit ahte Sámedikki meaddimat eai čuoza Várdobáikái, dadjaba Muotka ja Eira-Åhrén.
Sámedikki siskkáldas geahčadeapmi maiddái sáddejuvvo Riikarevišuvdnii ja Gielda- ja guovlodepartementii.
Loga reivve loatnadáhkádus ášši birra Gielda- ja guovlodepartementii (PDF, 67 kB)
Loga reivve loatnadáhkádus ášši birra Riikkarevišuvdnii (PDF, 67 kB)
Loga Sámedikki čilgehusa KDD:i ja Riikkarevišuvdnii (DOCX, 70 kB)
Loga áššeovddidusa ja mearrádusa dahkkon sámediggeráđis Sámedikki loatnadáhkádusáššis (DOCX, 41 kB)
Geahča bajilgova mearrádusain mat leat dahkkon áššis jagiin 2017, 2018 ja 2019 (PDF, 54 kB)
Várdobáiki AS eaiggádat:
Sámediggi eaiggáda 48,7% ossosiin Várdobáiki ASas.
Eará eaiggádat leat Evenášši suohkan 8,045%. Dielddanuorri suohkan 6,436%, Áhkkánjárga suohkan 6,436%, Rivtták suohkan 1,609%, ja searvvit, lihtut ja priváhta olbmot.
Geahča olles oasusoamasteddjiid proff.no siiddus: Várdobáiki AS – Aksjonærer i Norge.