Soai oaivvildeaba dan fertet dahkkot sihkkarastit daid smávimus bivdofatnasiid guolásteddjiid ruhtadili, maŋŋel go leat leamaš guokte váttes jagi dahje dorskebivdoáigodaga.

– Giđa dálkkiid geažil ja danne go ii lean buorre goddit guoli giđđat, de lea riddoguolástusortnegis ain stuora bivdoearri mii ii leat devdojuvvon. Mii leat hárjánan ahte dákkárat rievddadit jagis jahkái, ja leat hárjánan heivehit iežamet dilálašvuođaide. Vai dienas lea dásset áiggi badjel ja vai sihkkarastit ahte ii oktage šatta heaitit, de lea dehálaš ahte sámi guovlluid guolásteddjiin lea doarvái bivdoearri boahtte jagi, dadjá Bivdu jođiheaddji Inge Arne Eriksen.

Sámediggepresideanta Silje Karine Muotka oaivvilda unnimus bivdofatnasiid olu sámi riddoservodagaid geađgejuolgin. Go daidda láhčá buriid rámmaeavttuid, de lea maiddái sihkkarastime sámi kultuvrra ávnnaslaš vuođu. Diibmá čuhce koronapandemiija, váttis logistihkka ja váttis márkandilálašvuođat dorskebivdui, muhto dán jagi leat luonddudilálašvuođat mat leat bivddu dahkan váttisin.

– Hálan dávjá Erikseniin, ja son goziha dárkilit guollesálašstatistihka, ja ovdal beassážiid juo šiehtaime ahte lea riekta lasihit fanasbivdoeriid riddoguolástanortnegis sihkkarastin dihtii doarvái vuođđoávdnasiid oažžuma báikkálaš vuostáiváldiide, ja dasa oaččuime doarjaga, dadjá Muotka.

Smávimus bivdofatnasiin lea maiddái gaskamearálaččat dat unnimus doaibmamargiidna, ja leat dávjá rašis diliin go dálkkit dávjá rievddadit ja lea váttis olahit bivdosajiide.

Máhcahagat maid sihke Sámediggi ja Bivdu leat ožžon sámi guovlluid guolásteddjiin čájehit ahte dorski bođii maŋŋit riddoguovlluide dán jagi, ja muhtin guovlluin dorski ii oba boahtán ge vuonaide. Dál goappašagat oaivvildeaba ahte lea erenoamáš dehálaš láhčit unnimus bivdofatnasiidda buot buoremus vejolaš bivdoáigodaga boahtte jahkái, ja de lea dušše sávvat ahte jagis 2023 leat buoret dilálašvuođat.

Gažaldagaide vástideaba dahje jearahallama addiba, sámediggepresideanta Silje Karine Muotka, tlf. +47 984 87 576, silje.karine.muotka@samediggi.no  ja mearrasámi riddoguolástusorganisašuvnna Bivdu jođiheaddji, Inge Arne Eriksen, tlf: +47 915 20 202, inge@bivdu.no