Boahtteáiggi giellaoahpahus

Boahtteáiggi giellaoahpahus

Sámediggi lea juolludan doarjaga lágidit giellakurssa rávisolbmuide digitála arenas. Sámi organišašuvnnat čájehit dás movt birget geográfalaš hehttehusaiguin go áigut ealáskahttit sámi gielaid.

Mjøsan Dajve Saemien Siebrie/Mjøsa og Omegn Sameforening lea ohcan doarjaga lágidit giellakurssa rávisolbmuide digitála arenas, ja sámediggeráđđi lea juolludan 45 600 ruvvno dán doibmi.

Olu sámit guovllus gos Mjøsan Dajve Saemien Siebrie/Mjøsa og Omegn Sameforening doaibmá, leat ohcalan sámegielkurssa. Sii orrot bieđgguid ja ii leat nu álki searvat deaivvademiide. Dan dihte áigu saemien siebrie ovttas E-skuvllain lágidit neahttakurssa.

– Digitála areanat leat boahtteáiggi oahpahusarenat. Oahpahus dákkár areanain addá vejolašvuođa eambbogiidda searvat kursii. Mii diehtit ahte giellaealáskahttin boahtteáiggis lea sorjavaš dás go oaidnit našunála fárrenminstariid, dadjá sámediggeráđđi Mikkel Eskil Mikkelsen (NSR).

Digitála giellaguovddážat

Dá berre leat geaidnu man guvlui bargat boahtteáiggis čujuha Mikkelsen, namalassii ávkkastallat digitála vejolašvuođaiguin.

– Sámediggeráđđái lea dehálaš addit organisašuvnnaide vejolašvuođa ođasmahttimii ja háhkat vásáhusaid boahtteáiggi giellakurssaid hápmemis, seammás go láhčet giellaarenaid sidjiide geat háliidit oahppat sámegiela. Koronaroasus lean earret eará giellaguovddážiid ávžžuhan ovttasbargat digitála giellakurssaid lágidemiin, ja mus lea duohta jáhkku ahte mii boahtteáiggis oaidnit vuosttaš digitála giellaguovddážiid. Sámediggi áigu láhčit dili dasa.

Doarjja leat juolluduvvo doarjjaortnegis Giellaprošeavttat.

Jearahallama addá dahje vástida gažaldagaide sámediggeráđđi Mikkel Eskil Mikkelsen (NSR), +47 917 42 161, mikkel.eskil.mikkelsen@samediggi.no.