Diehtojuohkinčoahkkimiin maid Sámediggi lea doallan boazodoalloguovlluin golggotmánus ja árrat skábmamánus dán jagi lea buot čoahkkimiin dieđihuvvon ahte gulaskuddanáigemearri lea menddo oanehaš. Diehtojuohkinčoahkkimiin leat boazodoallit ja dievasčoahkkinmeannudeamis sámediggeáirasat cuiggodan ahte boazodoalus lea olu bargu dán muttus áiggi.

— Mii leat vuhtii váldán boazodolliid máhcahagaid ja válljet guhkidit áigemeari. Lea hirpmus dehálaš ja viiddis dokumeanta mii galgá geahčaduvvot, ja dalle lea dehálaš ahte buot gullevaš bealit besset dárkilit geahčadit árvalusaid ja buktit cealkámušaid, dadjá sámediggeráđđi Hans Ole Eira (Gb).

Juovlamánu 14.b. rádjái leat dušše guokte gulaskuddancealkámuša boahtán. Leat maid boahtán cealkámušat diehtojuohkinčoahkkimiin maid Sámediggi lea doallan, muhto lea seamma dehálaš oažžut čálalaš cealkámušaid.

— Sámediggi háliida áššái nu olu cealkámušaid go vejolaš vai bargovuođđu lea viidát proseassas, ja dainna lágiin maid čájehit ipmárdusa boazodoalu bargodillái, loahpaha Eira.